tvañca bhadde sukhī hohi eso cāpi mahāmigoti.

Tattha sutaṃ vā diṭṭhaṃ vāti mayā ito pubbe evarūpaṃ diṭṭhaṃ vā sutaṃ vā natthi. Bhāsantiṃ mānusiṃ miginti ahaṃ hi ito pubbe mānusīvācaṃ bhāsantiṃ migiṃ neva addasaṃ. Na ca me sutā vā diṭṭhā vā bhāsantī mānusī migītipi pāli. Tesaṃ yathāpālimeva attho dissati. Bhaddeti luddako paṇḍito upāyakusalo iti taṃ ālapitvā puna tvañca eso cāpi mahāmigoti dvepi janā sukhitā niddukkhā hothāti taṃ assāsetvā bodhisattassa santikaṃ gantvā vāsiyā cammapāsaṃ chinditvā pāde laggaṃ pāsaṃ saṇikaṃ nīharitvā nhārūhi nhāruṃ maṃsena maṃsaṃ cammena cammaṃ paṭicchādetvā pādaṃ hatthena parimajji. Taṃkhaṇaññeva mahāsattassa pūritapāramitānubhāve luddakassa ca mettacittānubhāvena migiyā ca mittadhammānubhāvena nhārumaṃsacammāni ca nhārumaṃsacammehi ghaṭayiṃsu. Bodhisattopi sukhito niddukkho aṭṭhāsi. Migī bodhisattaṃ sukhitaṃ disvā somanassajātā luddakassa anumodanaṃ karontī pañcamaṃ gāthamāha

evaṃ luddaka nandassu saha sabbehi ñātibhi

yathāhamajja nandāmi muttaṃ disvā mahāmiganti.