Athekadivasaṃ rañño vappamaṅgalaṃ nāma ahosi. Taṃ divasaṃ sakalanagaraṃ devavimānaṃ viya alaṅkaronti. Sabbe dāsakammakarādayo ahatavatthanivatthā gandhamālāpaṭimaṇḍitā rājakule sannipatanti. Rañño kammante naṅgalasahassaṃ yojīyati. Tasmiṃ pana divase ekena ūnāni aṭṭhasatanaṅgalāni saddhiṃ balibaddarasmiyottehi rajataparikkhittāni honti. Rañño ālambananaṅgalaṃ pana rattasuvaṇṇaparikkhittaṃ hoti. Balibaddānaṃ siṅgāni rasmiyottapaṭodāni suvaṇṇaparikkhittāneva honti. Rājā mahāparivārena nagarā nikkhamanto puttaṃ gahetvā agamāsi. Kammantaṭṭhāne eko jambūrukkho bahalapalāso sandacchāyo ahosi. Tasseva heṭṭhā kumārassa sayanaṃ paññāpetvā upari suvaṇṇatārakakhacitavitānaṃ bandhāpetvā sāṇipākārena parikkhipāpetvā ārakkhaṃ ṭhapetvā rājā sabbālaṅkārena alaṅkaritvā amaccagaṇaparivuto naṅgalakaraṇaṭṭhānaṃ agamāsi. Tattha rājā suvaṇṇanaṅgalaṃ gaṇhāti amaccā ekenūnaṭṭhasatāni rajatanaṅgalāni kasakā sesanaṅgalāni. Te tāni gahetvā ito cito ca kasanti. Rājā pana orato pāraṃ gacchati pārato oraṃ gacchati. Etasmiṃ ṭhāne mahāsampatti hoti. Bodhisattaṃ parivāretvā nisinnadhātiyo rañño Sampattiṃ passissāmāti antosāṇito bahi nikkhantā. Bodhisatto ito citopi olokento kañci adisvā vegena uṭṭhāya pallaṅkaṃ ābhujitvā ānāpāne pariggahetvā paṭhamajjhānaṃ nibbattesi. Dhātiyo khajjabhojjantare vicaramānā thokaṃ cirāyiṃsu. Sesarukkhānaṃ chāyā nivattā tassa pana rukkhassa parimaṇḍalā hutvā aṭṭhāsi. Dhātiyo ayyaputto ekakoti vegena sāṇiṃ ukkhipitvā anto pavisamānā bodhisattaṃ sayane pallaṅkena nisinnaṃ tañca pāṭihāriyaṃ disvā gantvā rañño ārocesuṃ deva kumāro evaṃ nisinno evaṃ aññesaṃ rukkhānaṃ chāyā nivattā jambūrukkhassa parimaṇḍalā ṭhitāti. Rājā vegenāgantvā pāṭihāriyaṃ disvā idaṃ te tāta dutiyavandananti puttaṃ vandi.
Atha anukkamena bodhisatto soḷasavassuddesiko jāto. Rājā bodhisattassa tiṇṇaṃ utūnaṃ anucchavike tayo pāsāde kāresi ekaṃ navabhūmikaṃ ekaṃ sattabhūmikaṃ ekaṃ pañcabhūmikaṃ cattāḷīsasahassā ca nāṭakitthiyo upaṭṭhāpesi. Bodhisatto devo viya accharāsaṅghaparivuto alaṅkatanāṭakaparivuto nippurisehi turiyehi paricāriyamāno mahāsampattiṃ anubhavanto utuvārena tesu pāsādesu viharati. Rāhulamātā panassa aggamahesī ahosi. Tasseva mahāsampattiṃ anubhavantassa ekadivasaṃ ñātisaṅghassa abbhantare ayaṃ kathā udapādi siddhattho kīḷāpasutova viharati na kiñci sippaṃ sikkhati saṅgāme paccupaṭṭhite kiṃ karissatīti. Rājā bodhisattaṃ pakkosāpetvā tāta tava ñātakā Siddhattho kiñci sippaṃ asikkhitvā kīḷāpasuto vicaratīti vadanti ettakaṃ pattakālaṃ maññasīti. Deva mama sippaṃ sikkhanakiccaṃ natthi nagare mama sippadassanatthaṃ bheriñcārāpetha ito sattame divase ñātakānaṃ sippaṃ dassessāmīti. Rājā tathā akāsi. Bodhisatto akkhaṇavedhivālavedhisaravedhisaddavedhipuṅkānapuṅkadhanuggahe sannipātā- petvā mahājanassa majjhe aññehi dhanuggahehi asādhāraṇaṃ ñātakānaṃ dvādasasippaṃ dassesi. Taṃ sarabhaṅgajātake āgatanayeneva veditabbaṃ. Tadā tassa ñātisaṅgho nikkaṅkho ahosi.