Āvusoti vatvā sārīputtattheraṃ upasaṅkamitvā āvuso esa vighāsādo tumhākaṃ santike kiñci kathesīti pucchi. Āvuso mayāpi saddhiṃ kathesi imaṃ nīharituṃ vaṭṭatīti. Sādhu āvuso nīharāti vutte thero mā idha vasīti accharaṃ paharitvā taṃ nīhari. Te ubhopi samaggasaṃvāsaṃ vasitvā satthu santikaṃ gantvā vanditvā nisīdiṃsu. Satthā paṭisanthāraṃ katvā sukhena vassaṃ vasitthāti pucchi. Bhante eko vighāsādo amhe bhinditukāmo hutvā bhindituṃ asakkonto palāyīti vutte nakho so sārīputta idāneva pubbepesa tumhe bhindissāmīti bhindituṃ asakkonto palāyīti vatvā tehi yācito atītaṃ āhari.

Atīte bārāṇasiyaṃ brahmadatte rajjaṃ kārente bodhisatto araññe rukkhadevatā ahosi. Tadā sīho ca byaggho ca araññe pabbataguhāyaṃ vasanti. Eko sigālo te upaṭṭhahanto tesaṃ vighāsaṃ khāditvā mahākāyo hutvā ekadivasaṃ cintesi mayā sīhabyagghānaṃ maṃsaṃ na khāditapubbaṃ mayā ime dve jane bhindituṃ vaṭṭati tato tesaṃ kalahaṃ katvā matānaṃ maṃsaṃ khādissāmīti. So sīhaṃ upasaṅkamitvā kiṃ sāmi tumhākaṃ byagghena saddhiṃ kiñci veraṃ atthīti pucchi. Kiṃ pana sammāti. Esa bhante mama āgatakāle sīho nāma sarīravaṇṇena vā ārohapariṇāhena vā jātibalaviriyehi vā mama kalabhāgampi na pāpuṇātīti tumhākaṃ aguṇameva kathesīti. Atha naṃ sīho gaccha tvaṃ na so evaṃ kathessatīti āha. Byagghampi upasaṅkamitvā eteneva upāyena kathesi. Taṃ sutvā byaggho sīhaṃ upasaṅkamitvā samma tvaṃ kira idañcidañca vadesīti pucchanto paṭhamaṃ gāthamāha

vaṇṇārohena jātiyā balanikkamanena ca

subāhu na mayā seyyo sudāḍho iti bhāsasīti.