Tasmiṃ samaye rāhulamātā puttaṃ vijāyīti sutvā suddhodanamahārājā puttassa me tuṭṭhiṃ nivedethāti sāsanaṃ pahiṇi. Bodhisatto taṃ sutvā rāhulo jāto bandhanaṃ jātanti āha. Rājā kiṃ me putto avacāti pucchitvā taṃ vacanaṃ sutvā ito paṭṭhāya me nattā rāhulakumārotveva nāma hotūti āha. Bodhisattopi kho rathavaraṃ āruyha mahantena yasena atimanoramena sirisobhaggena nagaraṃ pāvisi. Tasmiṃ samaye kisāgotamī nāma khattiyakaññā uparipāsādavaratalagatā nagaraṃ padakkhiṇaṃ kurumānassa bodhisattassa rūpasiriṃ disvā pītisomanassajātā imaṃ udānaṃ udānesi
nibbutā nūna sā mātā nibbuto nūna so pitā
nibbutā nūna sā nārī yassāyaṃ īdiso patīti. Bodhisatto taṃ sutvā cinatesi ayaṃ evaṃ āha evarūpaṃ attabhāvaṃ passantiyā mātu hadayaṃ nibbāyati pitu hadayaṃ nibbāyati pajāpatiyā hadayaṃ nibbāyatīti kasmiṃ nu kho nibbute hadayaṃ nibbutannāma hotīti. Athassa kilesesu virattamānasassa etadahosi rāgaggimhi nibbute nibbutannāma hoti dosaggimhi nibbute nibbutannāma hoti mohaggimhi nibbute nibbutannāma hoti mānadiṭṭhiādīsu sabbakilesesu darathesu nibbutesu nibbutannāma hoti ayaṃ me suvacanaṃ sāvesi ahaṃ hi nibbānaṃ gavesanto carāmi ajjeva mayā gharāvāsaṃ chaḍḍetvā nikkhamma pabbajitvā nibbānaṃ gavesituṃ vaṭṭatīti. Ayaṃ imissā ācariyabhāgo hotūti kaṇṭhato omuñcitvā kisāgotamiyā sahassagghanikaṃ muttāhāraṃ pesesi. Sā cintesi siddhatthakumāro mayi paṭibaddhacitto hutvā paṇṇākāraṃ pesesīti pītisomanassajātā ahosi.
Bodhisattopi mahantena sirisobhaggena attano pāsādaṃ āruhitvā sirisayane nipajji. Tāvadeva naṃ sabbālaṅkārapaṭimaṇḍitā naccagītādīsu susikkhitā devakaññā viya rūpasobhaggappattā itthiyo nānāturiyāni gahetvā samparivāretvā abhiramāpentiyo naccagītavāditāni payojayiṃsu. Bodhisatto kilesesu virattacittatāya naccādīsu anabhirato muhuttaṃ niddaṃ okkami. Tā itthiyo yassatthāya mayaṃ naccādīni payojema so niddaṃ upagato idāni kimatthaṃ kilamāmāti gahitagahitāni turiyāni ajjhottharitvā nipajjiṃsu. Gandhatelapadīpā jhāyanti. Bodhisatto pabujjhitvā sayanapiṭṭhe pallaṅkena nisinno addasa tā itthiyo turiyabhaṇḍāni avattharitvā niddāyantiyo ekaccā paggharitakheḷā lālākilinnagattā ekaccā dante khādantiyo ekaccā kākacchantiyo ekaccā vippalapantiyo ekaccā vivaṭamukhā ekaccā apagatavatthā pākaṭavibhacchasambādhaṭṭhānā. So tāsaṃ vippakāraṃ disvā bhiyyoso mattāya kāmesu virattacitto ahosi. Tassa alaṅkatapaṭiyattaṃ sakkabhavanasadisaṃpi taṃ mahātalaṃ apaviṭṭhanānākuṇapabharitaṃ āmakasusānaṃ viya upaṭṭhāsi tayo Bhavā ādittagehasadisā khāyiṃsu upaddūtaṃ vata bho upasaggaṃ vata bhoti udānaṃ pavattati ativiya pabbajjāya cittaṃ nami.