So ajjeva mahābhinikkhamanaṃ nikkhamituṃ vaṭṭatīti sayanā vuṭṭhāya dvārasamīpaṃ gantvā ko etthāti āha. Ummāre sīsaṃ katvā nipanno channo ahaṃ ayyaputta channoti āha. Channa ahaṃ ajja mahābhinikkhamanaṃ nikkhamitukāmo ekaṃ me assaṃ kappehīti. So sādhu devāti assabhaṇḍakaṃ gahetvā assasālaṃ gantvā gandhateladīpesu jalantesu samantato pasāritavitānassa heṭṭhā ramaṇīye bhūmibhāge ṭhitaṃ kanthakaṃ assarājaṃ disvā ajja mayā tameva kappetuṃ vaṭṭatīti kanthakaṃ kappesi. So kappiyamāno aññāsi ayaṃ me kappanā atidaḷhā aññesu divasesu uyyānakīḷādigamanakāle kappanā viya na hoti mayhaṃ ayyaputto ajja mahābhinikkhamanaṃ nikkhamitukāmo bhavissatīti tato tuṭṭhamānaso mahāhasitaṃ hasi. So saddo sakalanagaraṃ pattharitvā gaccheyya. Devatā pana sannirumhitvā na kassaci sotuṃ adaṃsu. Bodhisattopi kho channaṃ pesetvāva puttaṃ tāva passissāmīti cintetvā nisinnapallaṅkato vuṭṭhāya rāhulamātusayanaṭṭhānaṃ gantvā gabbhadvāraṃ vivari. Tasmiṃ khaṇe antogabbhe gandhatelabharitadīpo jhāyati. Rāhulamātāpi kho sumanamallikādīnaṃ pupphānaṃ ammaṇamattena abhippakiṇṇe sayane puttassa matthake hatthaṃ ṭhapetvā niddāyi. Bodhisatto ummāre pādaṃ ṭhapetvā ṭhitakova oloketvā sacāhaṃ deviyā hatthaṃ apanetvā mama puttaṃ Gaṇhissāmi devī pabujjhissati evaṃ me gamanantarāyo bhavissati ahaṃpi buddho hutvā ca āgantvā puttaṃ passissāmīti pāsādatalato otari. Yaṃ pana jātakaṭṭhakathāyaṃ tadā sattāhajāto rāhulakumāro hotīti vuttaṃ taṃ sesaṭṭhakathāsu natthi. Tasmā idameva gahetabbaṃ.
Evaṃ bodhisatto pāsādatalā otaritvā assasamīpaṃ gantvā evamāha tāta kanthaka ajja ekarattiṃ maṃ tāraya ahaṃ taṃ nissāya buddho hutvā sadevakaṃ lokaṃ tāressāmīti. Tadā ullaṅghitvā kanthakassa piṭṭhiṃ abhiruhi. Kanthako gīvato paṭṭhāya āyāmena aṭṭhārasahatthova hoti tadanucchavikena ubbedhena samannāgato thāmajavasampanno sabbaseto dhotasaṅkhasadiso. So sace haseyya vā padasaddaṃ vā kareyya saddo sakalanagaraṃ avatthareyya tasmā devatā attano ānubhāvena tassa yathā na koci suṇāti evaṃ hasitasaddaṃ sannirumhitvā akkamanapadavāre hatthatalāni upanāmesuṃ. Bodhisatto assapiṭṭhivaragato channaṃ assassa bāladhiṃ gāhāpetvā aḍḍharattikasamaye mahādvārasamīpaṃ patto. Tadā pana rājā evaṃ bodhisatto yāya kāyaci velāya nagaradvāraṃ vivaritvā nikkhamituṃ nāsakkhissatīti dvīsu dvārakavāṭesu ekekaṃ purisasahassena vivaritabbaṃ kārāpesi. Bodhisatto yathābalasampanno hatthigaṇanāya koṭisahassahatthīnaṃ balaṃ dhāreti purisagaṇanāya purisakoṭidasasatasahassabalaṃ dhāreti. Tasmā so cintesi sace dvāraṃ na vivareyya ajja kanthakassa piṭṭhe nisinnova bāladhiṃ Gahetvā ṭhitena channena saddhiṃyeva kanthakaṃ ūrūhi nippīḷetvā aṭṭhārasahatthubbedhaṃ pākāraṃ uppatitvā atikkamissāmīti. Channo cintesi sace dvāraṃ na vivarissati ahaṃ ayyaputtaṃ mama khandhe nisīdāpetvā kanthakaṃ dakkhiṇena hatthena kucchiyaṃ parikkhipanto upakacchantare katvā pākāraṃ uppatitvā atikkamissāmīti. Kanthakopi cintesi sace dvāraṃ na vivarissati ahaṃ attano sāmikaṃpi piṭṭhiyaṃ yathānisinnameva channena bāladhiṃ gahetvā ṭhitena saddhiññeva ukkhipitvā pākāraṃ uppatitvā atikkamissāmīti. Sace dvāraṃ na apārupayittha yathācintitameva tīsu janesu aññataro sampādeyya. Dvāre adhivaṭṭhā devatā pana dvāraṃ vivari.