Ticīvarañca patto ca vāsi sūci ca bandhanaṃ
parissāvanena aṭṭhete yuttayogassa bhikkhunoti. Ime aṭṭha parikkhāre āharitvā adāsi. Bodhisatto arahattaddhajaṃ nivāsetvā uttamapabbajjāvesaṃ gaṇhitvā channa mama vacanena mātāpitūnamārogyaṃ vadehīti uyyojesi. Channo bodhisattaṃ vanditvā padakkhiṇaṃ katvā pakkāmi. Kanthako pana channena saddhiṃ mantayamānassa bodhisattassa vacanaṃ suṇanto ṭhatvā natthidāni mayhaṃ puna sāmino dassananti cakkhupathaṃ vijahanto sokaṃ adhivāsetuṃ asakkonto hadaye phalite kālaṃ katvā tāvatiṃsabhavane kanthako nāma devaputto hutvā nibbatti. Channassa paṭhamaṃ ekova soko ahosi. Kanthakassa pana Kālakiriyāya dutiyena sokena pīḷito rodanto paridevanto agamāsi.
Bodhisattopi pabbajitvā tasmiṃyeva padese anupiyannāma ambavanaṃ atthi tattha sattāhaṃ pabbajjāsukhena vītināmetvā ekadivaseneva tiṃsayojanamaggaṃ padasā gantvā rājagahaṃ pāvisi pavisitvā ca pana sapadānaṃ piṇḍāya cari. Sakalanagaraṃ bodhisattassa rūpadassanena dhanapālakena paviṭṭharājagahaṃ viya asurindena paviṭṭhadevanagaraṃ viya ca saṅkhobhitaṃ agamāsi. Atha rājapurisā āgantvā deva evarūpo nāma satto nagare piṇḍāya vicarati devo vā manusso vā nāgo vā supaṇṇo vā ko nāma esoti na jānāmāti ārocesuṃ. Rājā pāsādatale ṭhatvā mahāpurisaṃ disvā acchariyabbhutajāto purise āṇāpesi gacchatha bhaṇe vīmaṃsatha sace amanusso bhavissati nagarā nikkhamitvā antaradhāyissati sace devatā bhavissati ākāsena gacchissati sace pana nāgo bhavissati paṭhaviyaṃ nimujjitvā gamissati sace manusso bhavissati yathāladdhaṃ bhikkhaṃ paribhuñjatīti. Mahāpurisopi kho missakabhattaṃ saṃharitvā alaṃ me ettakaṃ yāpanāyāti ñatvā paviṭṭhadvāreneva nagarā nikkhamitvā paṇḍavapabbatacchāyāya puratthābhimukho nisīditvā āhāraṃ paribhuñjituṃ āraddho. Athassa antāni parivattitvā mukhena nikkhamanākārappattāni ahesuṃ. Tato tena attabhāvena evarūpassa āhārassa cakkhunāpi adiṭṭhapubbatāya paṭikkūlāhārena aṭṭiyamāno evaṃ attanāva attānaṃ ovadi siddhattha tvaṃ bahusulabhaannapāne kule Tivassikagandhasālibhojananānaggarasabhojanaṭṭhāne nibbattitvā ekaṃ paṃsukūlikaṃ disvā kadā nu kho ahaṃpi evarūpo hutvā piṇḍāya caritvā paribhuñjissāmi bhavissati nu kho me so kāloti cintetvā nikkhamanto idāni kinnāmetaṃ karosīti evaṃ attānaṃ ovaditvā nibbikāro hutvā āhāraṃ paribhuñji. Rājapurisā taṃ pavuttiṃ disvā gantvā rañño ārocesuṃ. Rājā dūtasseva vacanaṃ sutvā vegena nagarā nikkhamitvā bodhisattassa santikaṃ gantvā iriyāpathasmiṃyeva pasīditvā bodhisattassa issariyaṃ niyyādesi. Bodhisatto mayhaṃ mahārāja vatthukāmehi vā kilesakāmehi vā attho natthi ahaṃ paramābhisambodhiṃ paṭṭhayanto nikkhantoti. Rājā anekappakāraṃ yācantopi tassa cittaṃ alabhitvā addhā tvaṃ buddho bhavissasi buddhabhūtena pana te paṭhamaṃ mama vijitaṃ āgantabbanti. Ayamettha saṅkhepo. Vitthāro pana pabbajjaṃ kittayissāmi yathā pabbaji cakkhumāti imaṃ pabbajjāsuttasaddaṃ aṭṭhakathāya oloketvā veditabbo.