Āgantvā nadītīre ṭhatvā mātali tvaṃ maccho bhava pañcasikha tvaṃ sakuṇo bhava ahaṃ pana sigālo hutvā mukhena maṃsapiṇḍaṃ gahetvā etissā sammukhaṭṭhānaṃ gamissāmi tvaṃ mayi tattha gate udakato ullaṅghitvā mama purato pata athāhaṃ mukhena gahitamaṃsapiṇḍaṃ chaḍḍetvā macchaṃ gahetuṃ pakkhandissāmi tasmiṃ khaṇe tvaṃ pañcasikha taṃ maṃsapiṇḍaṃ gahetvā ākāse uppati tvaṃ mātali udake patāti āṇāpesi. Sādhu devāti. Mātali maccho ahosi. Pañcasikho sakuṇo ahosi. Sakko sigālo hutvā maṃsapiṇḍaṃ mukhenādāya tassā sammukhaṭṭhānaṃ agamāsi. Maccho udakā uppatitvā sigālassa purato pati. So mukhena gahitaṃ maṃsapiṇḍaṃ chaḍḍetvā macchassatthāya pakkhandi. Maccho uppatitvā udake pati. Sakuṇo maṃsapiṇḍaṃ gahetvā ākāse uppati. Sigālo ubhopi alabhitvā eḷagaṇigumbaṃ olokento dummukho nisīdi. Sā taṃ disvā ayaṃ atricchatāhato neva maṃsaṃ na macchaṃ labhatīti kūṭaṃ bhindantī viya mahāhasitaṃ hasi. Taṃ sutvā sigālo tatiyaṃ gāthamāha

kāyaṃ eḷagaṇigumbe karoti ahuhāsiyaṃ

nayidha naccaṃ vā gītaṃ vā tāḷaṃ vā susamāhitaṃ

anamhikāle sussoṇi kinnu jagghasi sobhaneti.