Bodhisatto bodhirukkhakkhandhaṃ piṭṭhito katvā puratthābhimukho daḷhamānaso hutvā

kāmaṃ taco nahārū ca aṭṭhi ca avasissatu

sabbaṃpi hidaṃ sarīre maṃsalohitaṃ upasussatu tattheva sammāsambodhiṃ appatvā imaṃ pallaṅkaṃ na bhindissāmīti asanisatasannipātenāpi abhejjarūpaṃ aparājitaṃ pallaṅkaṃ ābhujitvā nisīdi.

Tasmiṃ samaye māro devaputto siddhatthakumāro mayhaṃ vasaṃ atikkamitukāmo na dānimassa atikkamituṃ dassāmīti mārabalassa santikaṃ gantvā etamatthaṃ ārocetvā māraghosanannāma ghosāpetvā mārabalaṃ ādāya nikkhami. Sā pana mārasenā mārassa purato dvādasayojanā hoti dakkhiṇato ca vāmato ca dvādasayojanā hoti. Pacchato pana cakkavāḷapariyantaṃ katvā ṭhitā uddhaṃ navayojanubbedhā mārasenā yassā unnadantiyā unnādasaddo pana yojanasahassato paṭṭhāya paṭhaviyā udriyanasaddo viya suyyati. Atha māro devaputto diyaḍḍhayojanasatikaṃ girimekhalannāma hatthiṃ abhiruyhitvā bāhusahassaṃ māpetvā nānāvudhāni aggahesi. Avasesāyapi māraparisāya dve janā ekasadisaṃ āvudhaṃ na gaṇhiṃsu nānappakāramukhā hutvā mahāsattaṃ ajjhottharamānā viya āgamiṃsu. Dasasahassacakkavāḷadevatā pana mahāsattassa thutiyo vadamānā aṭṭhaṃsu. Sakko pana devarājā vijayuttarasaṅkhaṃ dhamamāno aṭṭhāsi. So kira saṅkho Vīsatihatthasatiko hoti sakiṃ vātaṃ gāhāpetvā dhamanto cattāro māse saddaṃ karitvā nissaddo hoti. Mahākālanāgarājā atirekaṃ padasatena vaṇṇaṃ vadamāno aṭṭhāsi. Mahābrahmā setacchattaṃ dhārayamāno aṭṭhāsi. Mārabale pana bodhimaṇḍaṃ upasaṅkamante tesu ekopi ṭhātuṃ nāsakkhi. Sammukhasammukhaṭṭhāneva palāyiṃsu. Kālanāgarājā paṭhaviyaṃ nimujjitvā pañcayojanasatikamandiraṃ nāgabhavanaṃ gantvā ubhohi hatthehi mukhaṃ pidahitvā nipanno. Sakko vijayuttarasaṅkhaṃ piṭṭhiyaṃ katvā cakkavāḷamukhavaṭṭiyaṃ aṭṭhāsi. Mahābrahmā setacchattaṃ koṭiyaṃ gahetvā brahmalokameva agamāsi. Ekadevatāpi ṭhātuṃ samatthā nāma nāhosi. Mahāpuriso ekakova nisīdi.