Māropi attano parisaṃ āha tātā suddhodanaputtena siddhatthena sadiso añño puriso nāma natthi mayaṃ sammukhā yuddhaṃ dātuṃ na sakkhissāma pacchābhāgena dassāmāti. Mahāpurisopi tīṇipi passāni oloketvā sabbadevatānaṃ palātattā suññāni addasa. Puna uttarapassena mārabalaṃ ajjhottharamānaṃ disvā ayaṃ ettako jano maṃ ekakaṃ sandhāya mahantaṃ vāyāmaṃ parakkamaṃ karoti imasmiṃ ṭhāne mātāpitaro vā dhītā vā bhātā vā añño vā koci ñātako natthi imā pana dasapāramiyova mayhaṃ dīgharattaṃ puttaparijanasadisā tasmā pāramiyopi phalakaṃ katvā pāramisattheneva paharitvā imaṃ balakāyaṃ mayā viddhaṃsetuṃ vaṭṭatīti dasapāramiyo āvajjamāno nisīdi. Atha māro devaputto eteneva siddhatthaṃ Palāpessāmīti vātamaṇḍalaṃ samuṭṭhāpesi. Taṃ khaṇaṃyeva puratthimādibhedā vātā samuṭṭhahitvā aḍḍhayojanatiyojanappamāṇāni pabbatakūṭāni padāletvā vanagaccharukkhādīni ummūletvā samantā gāmanigame cuṇṇavicuṇṇe kātuṃ samatthāpi mahāpurisassa puññatejena vihatānubhāvā bodhisattaṃ patvā cīvarakaṇṇamattaṃpi cāletuṃ nāsakkhiṃsu. Tato udakena ajjhottharitvā māressāmīti mahāvassaṃ samuṭṭhāpesi. Tassānubhāvena upari satapaṭalasahassapaṭalādibhedā valāhakā uṭṭhahitvā vassiṃsu. Vuṭṭhidhāravegena paṭhavī chiddā ahosi. Vanarukkhādīnaṃ uparibhāgena mahāmegho āgantvā mahāsattassa cīvare ussāvavindupatanamattaṃpi temetuṃ nāsakkhi. Tato pāsāṇavassaṃ samuṭṭhāpesi. Mahantāni pabbatakūṭāni dhūmāyantāni pajjalantāni ākāsenāgantvā bodhisattaṃ patvā dibbamālāguḷabhāvaṃ āpajjiṃsu. Tato paharaṇavassaṃ samuṭṭhāpesi. Ekatodhārā ubhatodhārā asisattikhurappādayo dhūmāyantā pajjalantā ākāsenāgantvā bodhisattaṃ patvā dibbapupphāni ahesuṃ. Tato aṅgāravassaṃ samuṭṭhāpesi. Kiṃsukavaṇṇā aṅgārā ākāsenāgantvā bodhisattassa pādamūle dibbapupphāni hutvā vikiriṃsu. Tato kukkuḷavassaṃ samuṭṭhāpesi. Accuṇho aggivaṇṇo kukkuḷo ākāsenāgantvā bodhisattassa pādamūle candanacuṇṇaṃ hutvā nipati. Tato vālukāvassaṃ samuṭṭhāpesi. Atisukhumā vālukā dhūmāyantā pajjalantā ākāsenāgantvā bodhisattassa pādamūle dibbapupphāni hutvā nipatiṃsu. Tato kalalavassaṃ samuṭṭhāpesi. Kalalaṃ dhūmāyantaṃ pajjalantaṃ ākāsenāgantvā bodhisattassa pādamūle dibbavilepanaṃ hutvā nipati. Tato imināhaṃ bhiṃsetvā siddhatthaṃ palāpessāmīti andhakāraṃ samuṭṭhāpesi. Taṃ caturaṅgasamannāgataṃ viya mahātamaṃ hutvā bodhisattaṃ patvā suriyappabhāvihataṃ viya andhakāraṃ antaradhāyi. Evaṃ māro imāhi navahi vātavassapāsāṇapaharaṇaṅgārakukkuḷavālukakalalaandhakāravuṭṭhīhi bodhisattaṃ palāpetuṃ asakkonto kiṃ bhaṇe tiṭṭhatha imaṃ siddhatthakumāraṃ gaṇhatha hanatha palāpethāti taṃ parisaṃ āṇāpetvā sayaṃpi girimekhalassa hatthino khandhe nisinno cakkāvudhaṃ ādāya bodhisattaṃ upasaṅkamitvā siddhattha uṭṭhehi etasmā pallaṅkā nāyaṃ tuyhaṃ pāpuṇāti mayhaṃ eso pāpuṇātīti āha. Mahāsatto tassa vacanaṃ sutvā avoca māra neva tayā dasa pāramiyo pūritā na upapāramiyo na paramatthapāramiyo nāpi pañca mahāpariccāgā pariccattā na ñātatthacariyā na lokatthacariyā na buddhatthacariyā pūritā nāyaṃ pallaṅko tuyhaṃ pāpuṇāti mayhaṃ eso pāpuṇātīti āha. Māro kuddho kodhavegaṃ asahanto mahāpurisassa cakkāvudhaṃ vissajjesi. Tantassa dasa pāramiyo āvajjentassa uparibhāge mālāvitānaṃ hutvā aṭṭhāsi. Taṃ kira khuradhāraṃ cakkāvudhaṃ aññesu tena kuddhena vissaṭṭhaṃ ekaghane pāsāṇathambhe vaṃsakaḷīraṃ viya chindantaṃ gacchati. Idāni pana tasmiṃ mālāvitānaṃ hutvā ṭhite avasesā māraparisā idāni pallaṅkato vuṭṭhāya palāyissatīti mahantamahantāni selakūṭāni vissajjesuṃ. Tānipi Mahāpurisassa dasa pārimiyo āvajjentassa mālāguḷabhāvaṃ āpajjitvā bhūmiyaṃ patiṃsu. Devatā cakkavāḷamukhavaṭṭiyaṃ ṭhitā gīvaṃ pasāretvā sīsaṃ ukkhipitvā naṭṭho vata bho siddhatthakumārassa rūpasobhaggappatto attabhāvo kiṃ nu kho karissatīti olokenti.