Evaṃpi bodhisatto rañño āgatāgatadivase imā gāthā abhāsi. Rājā pasannacitto mahāsattassa satasahassuṭṭhānakaṃ ekaṃ gāmavaraṃ adāsi. Bodhisatto paṭikkhipi. Iti so tattheva dvādasa saṃvacchare vasitvā aticiraṃ nivuṭṭhosmi janapadacārikaṃ tāva caritvā āgamissāmīti rañño akathetvāva uyyānapālaṃ āmantetvā tāta ukkaṇṭhitarūposmi janapadaṃ caritvā āgamissāmi tvaṃ rañño katheyyāsīti vatvā pakkanto gaṅgāya nāvātitthaṃ pāpuṇi. Tattha āvāriyapitā nāma nāviko ahosi so bālo neva guṇavantānaṃ guṇaṃ jānāti na attanova upāyaṃ jānāti. So gaṅgātaritukāmaṃ janaṃ paṭhamaṃ taritvā pacchā vetanaṃ yācati vetanaṃ adentehi saddhiṃ kalahaṃ karonto akkosappahāreyeva bahū labhati. Appalābhaṃ evarūpaṃ andhabālaṃ taṃ sandhāya satthā abhisambuddho hutvā tatiyaṃ gāthamāha

āvāriyapitā nāma ahū gaṅgāya nāviko

pubbe janaṃ tārayitvā pacchā yācati vetanaṃ

tenassa bhaṇḍanaṃ hoti na ca bhogehi vaḍḍhatīti.