Tattha paṅkoti udake jātāni tiṇasevālakanaḷakumudagacchādīni adhippetāni. Yathā hi udakaṃ tarantaṃ tāni laggāpenti tathā saṃsārasāgaraṃ tarantassa yogāvacarassa pañcakāmaguṇā sabbe vā pana vatthukāmakilesakāmā laggāpanavasena paṅko nāma imasmiṃ hi paṅke āsattā visattā devāpi manussāpi tiracchānāpi kilamanti rodanti paridevanti. Palipova kāmāti palipo vuccati mahākaddamo yamhi Yamhi laggā sūkaramigādayopi sīhāpi vāraṇāpi attānaṃ uddharitvā gantuṃ na sakkonti vatthukāmakilesakāmāpi taṃsarikkhatāya pana palipāti vuttā paññavantopi hi sattā tesu kāmesu sakiṃ laggakālato paṭṭhāya te kāme padāletvā sīghaṃ uṭṭhāya akiñcanaṃ apalibodhaṃ ramaṇīyaṃ pabbajjaṃ upagantuṃ na sakkonti. Bhayañca metanti bhayañca etaṃ makāro byañjanapadasandhivasena vutto. Timūlanti tīhi mūlehi patiṭṭhaṃ viya acalaṃ balavabhayassetaṃ nāmaṃ. Pavuttanti mahārāja ete kāmā nāma diṭṭhadhammikasamparāyikassa attānuvādabhayādikassa ceva dvattiṃsakammakaraṇaaṭṭhanavutirogādivasappavattassa ca bhayassa paccayaṭṭhena balavabhayanti buddhapaccekabuddhabuddhasāvakehi ceva sabbaññūbodhisattehi ca pavuttaṃ kathitaṃ dīpitanti attho. Athavā bhayañca metanti bhayañca mayā etaṃ timūlaṃ pavuttanti evañcettha attho daṭṭhabboyeva. Rajo ca dhūmo cāti rajadhūmasadisattā rajoti ca dhūmoti ca mayā pakāsitā. Yathā hi sunahātassa suvilittālaṅkatassa purisassa sarīre sukhumarajaṃ patitaṃ taṃ sarīraṃ dubbaṇṇaṃ sobhārahitaṃ kiliṭṭhaṃ karoti evameva iddhibalena ākāsenāgantvā cando viya suriyo viya ca loke paññātāpi sakiṃ kāmarajassa anto patitakālato paṭṭhāya guṇavaṇṇaguṇasobhāguṇasuddhīnaṃ upahatattā dubbaṇṇā sobhārahitā kiliṭṭhāyeva honti yathā ca dhūmena pahaṭakālato paṭṭhāya suparisuddhāpi bhittikālavaṇṇā honti evameva atiparisuddhañāṇāpi kāmadhūmena pahaṭakālato paṭṭhāya guṇavināsappattiyā mahājanamajjhe Kālakāva hutvā paññāyanti iti rajadhūmasarikkhatāya ete kāmā rajo ca dhūmo cāti mayā tuyhaṃ pakāsitā tasmā ime kāme hitvā tuvaṃ pabbaja brahmadattāti rājānampi pabbajjāya ussāhaṃ janeti.