Tattha mīḷhena littāti mahārāja ime sattā mātukucchito nikkhamantā na catujātigandhehi vilimpitvā surabhimālaṃ pilandhitvā nikkhamanti purāṇagūthena pana makkhitā palibuddhā hutvā nikkhamanti. Ruhirena makkhitāti rattalohitacandanānupalittāmiva hutvā na nikkhamanti rattalohitamakkhitā pana hutvā nikkhamanti. Semhena littāti na cāpi setacandanavilittā nikkhamanti bahalapicchilasemhena littā pana hutvā nikkhamanti itthīnaṃ hi gabbhavuṭṭhānakāle etāni asucīni nikkhamanti. Tāvadeti tasmiṃ samaye idaṃ vuttaṃ hoti mahārāja ime sattā tasmiṃ mātukucchito nikkhamanasamaye evaṃ mīḷhādilittā nikkhamantā yaṃ yaṃ nikkhamanamaggappadesaṃ vā hatthaṃ vā phusanti taṃ sabbaṃ asātaṃ amadhuraṃ kevalaṃ asucimissaṃ dukkhameva phusanti sukhaṃ nāma nesaṃ tasmiṃ samaye natthīti. Disvā vadāmi na hi aññato savanti mahārāja ahaṃ imaṃ ettakaṃ vadanto na aññato savaṃ aññassa samaṇassa vā brāhmaṇassa vā taṃ sutvā na vadāmi attano pana paccekabuddhañāṇena disvā paṭivijjhitvā paccakkhaṃ katvā vadāmīti attho. Pubbenivāsaṃ bahukanti idaṃ attano ānubhāvaṃ dassento āha. Idaṃ vuttaṃ hoti mahārāja ahaṃpi pubbe Nivuṭṭhakhandhapaṭipāṭisaṅkhātaṃ pubbenivāsaṃ bahukaṃ sarāmi satasahassakappādhikāni dve asaṅkheyyāni sarāmīti.

Idāni satthā abhisambuddho hutvā evaṃ so paccekabuddho rājānaṃ subhāsitagāthāya saṅgaṇhīti vatvā osāne upaḍḍhagāthamāha

citrāhi gāthāhi subhāsitāhi

darīmukho nijjhāpayī sumedhanti.