Yassa jālinī visattikā

taṇhā natthi kuhiñci netave

taṃ buddhamanantagocaraṃ

apadaṃ kena padena nessathāti imā dhammapade buddhavagge dve gāthā vadanto dhammaṃ kathesi. Tā saccaṃ kira no pitā avoca arahaṃ sugato loke na rāgena suvānayoti ādīni vatvā pitu santikaṃ agamaṃsu. Bhagavāpi tattha sattāhaṃ vītināmetvā muccalindamūle agamāsi tattha sattāhaṃ vaddalikāya uppannāya sītādipaṭivāhanatthaṃ muccalindena nāma nāgarājena sattakkhattuṃ bhogehi parikkhitto asambādhāya gandhakuṭiyaṃ viharanto viya vimuttisukhaṃ paṭisaṃvedayamāno sattāhaṃ vītināmetvā rājāyatanaṃ upasaṅkamitvā tatthāpi sattāhaṃ vimuttisukhapaṭisaṃvedīyeva nisīdi. Ettāvatā sattāhāni paripuṇṇāni. Etthantare neva mukhadhovanaṃ na sarīrapaṭijagganaṃ na āhārakiccaṃ ahosi. Jhānasukhena maggasukhena phalasukhena ca vītināmesi. Athassa tasmiṃ sattasattāhamatthake ekūnapaññāsamadivase tattha nisinnassa mukhaṃ dhovissāmīti cittaṃ udapādi. Sakko devānamindo attanā harītakaṃ āharitvā adāsi. Satthā taṃ paribhuñji. Tenassa sarīravalañjaṃ ahosi. Athassa sakkoyeva nāgalatādantakaṭṭhañceva mukhadhovanaudakañca adāsi. Satthā dantakaṭṭhaṃ Khāditvā anotattadahaudakena mukhaṃ dhovitvā tattheva rājāyatanamūle nisīdi.