Imañca te pitā bhadde sūciṃ jaññā mayā kataṃ

tayā ca maṃ nimanteyya yañcatthaññaṃ ghare dhananti.

Tattha sūcinti vibhattivipallāso kato. Idaṃ vuttaṃ hoti sūci Nāma pajānatā paṇḍitena purisena kammāragāmasmiṃyeva vikketabbā. Kiṃkāraṇā. Ācariyā pajānanti kammaṃ sukatadukkaṭanti tassa sippassa ācariyā ca tasmiṃ tasmiṃ sippe sukatadukkaṭaṃ kammaṃ jānanti svāhaṃ kammārakammaṃ ajānantānaṃ gahapatikānaṃ gāmaṃ gantvā mama sūciyā sukatadukkaṭabhāvaṃ kathaṃ jānāpessāmi imasmiṃ pana gāme mama balaṃ jānāpessāmīti. Evaṃ bodhisatto imāya gāthāya attano balaṃ vaṇṇesi. Tayā ca maṃ nimanteyyāti bhadde sace tava pitā imaṃ mayā kataṃ sūciṃ īdisā vā esā evaṃ pākaṭāti jāneyya imaṃ te dhītaraṃ pādaparicārikaṃ dammi gaṇhāti nanti evaṃ tayā ca maṃ nimanteyya. Yañcatthaññaṃ ghare dhananti yañca aññaṃ saviññāṇakaṃ vā aviññāṇakaṃ vā ghare dhanaṃ atthi tena maṃ nimanteyya. Yañcassaññantipi pāṭho. Yañca assa ghare aññaṃ dhanaṃ atthīti attho.

Kammārajeṭṭhako sabbaṃ tesaṃ kathaṃ sutvā ammāti dhītaraṃ pakkositvā kena saddhiṃ sallapasīti pucchi. Tāta eko puriso sūciṃ vikkīṇati tena saddhinti. So pakkosāhi nanti. Sā gantvā pakkosi. So bodhisatto gehaṃ pavisitvā kammārajeṭṭhakaṃ vanditvā aṭṭhāsi. Atha naṃ so kataragāmavāsikosīti pucchi. Asukagāmavāsikomhi asukakammārassa nāma puttoti. Kasmā idhāgatosīti. Sūcivikkīṇatthāyāti āha. Sūciṃ te passāmāti. Bodhisatto attano guṇaṃ sabbesaṃ majjhe pakāsetukāmo nanu ekakānaṃ volokitato sabbesaṃ majjhe volokituṃ varataranti āha. So sādhu Tātāti sabbe kammāre sannipātetvā tehi parivuto āhara tāta mayaṃ passāma te sūcinti āha. Ācariya ekaṃ adhikaraṇañca udakapuṇṇañca kaṃsathālaṃ āharāpethāti. So āharāpesi. Bodhisatto ovaṭṭikato sūcināḷikaṃ vivaritvā adāsi. Kammārajeṭṭhako tato sūciṃ nīharitvā ayaṃ tāta sūcīti pucchi . Nāyaṃ sūci sūcikosako esoti. So upadhārento nevantaṃ na koṭiṃ addasa. Bodhisatto āharāpetvā nakhena kosakaṃ apanetvā ayaṃ sūci ayaṃ kosakoti mahājanassa dassetvā sūciṃ ācariyassa hatthe kosakaṃ pādamūle ṭhapesi. Puna tena ayaṃ maññe tāta sūcīti vutto ayaṃpi na sūci sūcikosakoyevāti vatvā nakhena paharanto paṭipāṭiyā cha kosake kammārajeṭṭhakassa pādamūle ṭhapetvā ayaṃ sūcīti tassa hatthe ṭhapesi. Kammārasahassā aṅguliyo poṭhesuṃ celukkhepā pavattayiṃsu. Atha naṃ kammārajeṭṭhako tāta imāya sūciyā kiṃ balanti pucchi. Ācariya balavatā purisena adhikaraṇaṃ ukkhipāpetvā adhikaraṇiyā heṭṭhā udakapāṭiṃ ṭhapāpetvā adhikaraṇiyā majjhe imaṃ sūciṃ paharathāti. So tathā kāretvā adhikaraṇiyā majjhe sūciṃ agge pahari. Sā adhikaraṇiṃ vinivijjhitvā udakapiṭṭhe kesaggamattampi uddhaṃ vā adho vā ahutvā tiriyaṃ patiṭṭhāsi. Sabbe kammārā amhehi ettakaṃ kālaṃ kammārā nāma edisā hontīti sutavasenapi na sutapubbanti aṅguliyo poṭhetvā celukkhepasahassāni pavattayiṃsu. Kammārajeṭṭhako dhītaraṃ pakkosāpetvā Tasmiṃyeva ca parisamajjhe ayaṃ kumārikā tuyhaṃyeva anucchavikāti udakaṃ pātetvā adāsi. So aparabhāge kammārajeṭṭhakassa accayena tasmiṃ gāme kammārajeṭṭhako ahosi.