Tasmiṃ samaye tapussabhallikā nāma dve vāṇijā pañcahi sakaṭasatehi ukkalājanapadā majjhimappadesaṃ gacchanto attano ñātisālohitāya devatāya sakaṭāni sannirumhitvā satthu āhārasampādane ussāhitā manthañca madhupiṇḍikañca ādāya paṭiggaṇhātu no bhante bhagavā imaṃ āhāraṃ anukampaṃ upādāyāti satthāraṃ upasaṅkamitvā aṭṭhaṃsu. Bhagavā pana pāyāsapaṭiggahaṇadivaseyeva pattassa antarahitattā na kho tathāgatā hatthesu paṭiggaṇhanti kiṃ nu kho ahaṃ paṭiggaṇheyyanti cintesi. Athassa cittaṃ ñatvā catūhi disāhi cattāro mahārājāno indanīlamaṇimaye patte upanāmesuṃ. Bhagavā te paṭikkhipi. Puna muggavaṇṇaselamaye cattāro patte upanāmesuṃ. Bhagavā catunnaṃpi devaputtānaṃ anukampāya cattāro pattepi paṭiggahetvā uparupari ṭhapetvā eko hotūti adhiṭṭhahi. Cattāropi mukhavaṭṭiyaṃ paññāyamānā lekhā hutvā majjhimena pamāṇena ekattaṃ upagamiṃsu. Bhagavā tasmiṃ paccakkhe selamaye patte āhāraṃ paṭiggaṇhitvā paribhuñjitvā anumodanaṃ akāsi. Dve bhātaro vāṇijā buddhañca dhammañca saraṇaṃ gantvā dvevācikā upāsakā ahesuṃ. Atha nesaṃ ekanno bhante paricāritabbaṭṭhānaṃ dethāti vadantānaṃ dakkhiṇahatthena attano sīsaṃ parāmasitvā kesadhātuyo adāsi. Te attano nagare kesadhātuyo Anto pakkhipitvā cetiyaṃ patiṭṭhāpesuṃ.
Sammāsambuddhopi kho tato paṭṭhāya puna ajapālanigrodhameva gantvā nigrodhamūle nisīdi. Athassa tattha nisinnamattasseva attanā adhigatassa dhammassa gambhīrataṃ paccavekkhantassa sabbabuddhānaṃ āciṇṇo adhigato kho mayāyaṃ dhammoti paresaṃ dhammaṃ adesetukāmyatākārappatto vitakko udapādi. Atha brahmā sahampati nassati vata bho loko vinassati vata bho lokoti dasahi cakkavāḷasahassehi sakkasuyāmasantusitavasavattimahābrahmāno ādāya satthu santikaṃ gantvā desetu bhante bhagavā dhammanti ādinā nayena dhammadesanaṃ āyāci. Satthā tassa paṭiññaṃ datvā kassa nu kho ahaṃ paṭhamaṃ dhammaṃ deseyyanti cintento āḷāro paṇḍito so imaṃ dhammaṃ khippaṃ ājānissatīti cittaṃ uppādetvā puna olokento tassa sattāhaṃ kālakatabhāvaṃ ñatvā uddakaṃ āvajjesi tassāpi abhidosakālakatabhāvaṃ ñatvā bahupakārā kho me pañcavaggiyā bhikkhūti pañcavaggiye ārabbha manasikāraṃ katvā kahaṃ nu kho te etarahi viharantīti āvajjento bārāṇasiyaṃ migadāyeti ñatvā tattha gantvā dhammacakkaṃ pavattessāmīti katipāhaṃ bodhimaṇḍasāmantāyeva piṇḍāya caranto āsāḷhapuṇṇamāsiyaṃ bārāṇasiṃ gamissāmīti cātuddasiyaṃ paccūsasamaye pabhātāya rattiyā kālasseva pattacīvaramādāya aṭṭhārasayojanamaggaṃ paṭipanno antarāmagge upakannāma ājīvakaṃ disvā tassa taṃ attano buddhabhāvaṃ ācikkhitvā taṃ divasaṃyeva Sāyaṇhasamaye isipatanaṃ agamāsi.