Pañcavaggiyā therā tathāgataṃ dūratova āgacchantaṃ disvā ayaṃ āvuso samaṇo gotamo paccayabāhullāya āvattitvā paripuṇṇakāyo piṇindriyo suvaṇṇavaṇṇo hutvā āgacchati imassa abhivādanādīni na karissāma mahākulappasūto kho panesa āsanābhihāraṃ arahati tenassa āsanamattaṃ paññāpessāmāti katikaṃ akaṃsu. Bhagavā sadevakassa lokassa cittavāraṃ jānanasamatthena ñāṇena kiṃ nu kho ime cintayiṃsūti āvajjetvā cittaṃ aññāsi. Atha ne sabbadevamanussesu anodissakavasena pharaṇasamatthaṃ mettacittaṃ saṅkhipitvā odissakavasena mettacittena phari. Te bhagavatā mettena cittena phuṭṭhā tathāgate upasaṅkamante sakāya katikāya saṇṭhātuṃ asakkontā abhivādanapaccuṭṭhānādīni sabbakiccāni akaṃsu sammāsambuddhabhāvaṃ panassa ajānamānā kevalaṃ nāmena ca āvusovādena ca vācaṃ samudācaranti. Atha ne bhagavā mā bhikkhave tathāgataṃ nāmena ca āvusovādena ca samudācaratha arahaṃ bhikkhave tathāgato sammāsambuddhoti attano buddhabhāvaṃ saññāpetvā paññattapavarabuddhāsane nisinno uttarāsāḷhanakkhattayoge vattamāne aṭṭhārasabrahmakoṭīhi parivuto pañcavaggiye there āmantesi dhammacakkappavattanasuttantaṃ desesi. Tesu aññākoṇḍaññatthero desanānusārena ñāṇaṃ pesento suttapariyosāne aṭṭhārasahi brahmakoṭīhi saddhiṃ sotāpattiphale patiṭṭhāsi. Satthā tattheva vassaṃ upagantvā Punadivase vappattheraṃ ovadanto vihāreyeva nisīdi. Sesā cattāro piṇḍāya cariṃsu. Vappatthero pubbaṇheyeva sotāpattiphalaṃ pāpuṇi. Eteneva upāyena ca punadivase bhaddiyattheraṃ punadivase mahānāmattheraṃ punadivase assajittheranti sabbe sotāpattiphale patiṭṭhāpetvā pañcamiyaṃ pakkhassa pañcapi jane sannipātetvā anattalakkhaṇasuttantaṃ desesi. Desanāpariyosāne pañcapi therā arahatte patiṭṭhahiṃsu.
Atha satthā yasassa kulaputtassa upanissayaṃ disvā taṃ rattibhāge nibbijjitvā gehaṃ pahāya nikkhantaṃ ehi yasāti pakkositvā tasmiṃyeva rattibhāge sotāpattiphale patiṭṭhāpesi. Punadivase arahatte patiṭṭhāpetvā aparepi tassa sahāyake catuppaññāsa jane ehibhikkhupabbajjāya pabbājetvā arahattaṃ pāpesi. Evaṃ hi loke ekasaṭṭhiyā arahantesu jātesu satthā vutthavasso pavāretvā caratha bhikkhave cārikanti saṭṭhibhikkhū disāsu pesetvā sayaṃ uruvelaṃ gacchanto antarāmagge kappāsikavanasaṇḍe tiṃsajane bhaddavaggiyakumāre vinesi. Tesu sabbapacchimako sotāpanno sabbauttamo anāgāmī ahosi. Tepi sabbe ehibhikkhubhāveneva pabbājetvā disāsu pesetvā uruvelaṃ gantvā aḍḍhuḍḍhāni pāṭihāriyasahassāni dassetvā uruvelakassapādayo sahassajaṭilaparivāre tebhātikajaṭile vinetvā ehibhikkhubhāveneva pabbājetvā gayāsīse nisīdāpetvā ādittapariyāyadesanāya arahatte patiṭṭhāpetvā tena arahantasahassena parivuto Bimbisārarañño dinnapaṭiññaṃ mocessāmīti rājagahanagarūpacāre laṭṭhivanuyyānaṃ agamāsi. Rājā uyyānapālassa santikā satthā āgatoti sutvā dvādasanahutehi brāhmaṇagahapatikehi parivuto satthāraṃ upasaṅkamitvā cakkavicittatalesu suvaṇṇapaṭṭavitānaṃ viya pabhāya samudayaṃ vissajjentesu tathāgatassa pādesu sirasā nipatitvā ekamante nisīdi saddhiṃ parisāya. Atha kho tesaṃ brāhmaṇagahapatikānaṃ etadahosi kiṃ nu kho mahāsamaṇo uruvelakassape brahmacariyaṃ carati udāhu uruvelakassapo mahāsamaṇeti. Bhagavā tesaṃ cetoparivitakkamaññāya theraṃ gāthāya ajjhabhāsi