tasmā na yiṭṭhe na hute arañjinti imaṃ gāthaṃ vatvā attano sāvakabhāvappakāsanatthaṃ tathāgatassa pādapiṭṭhe sīsaṃ ṭhapetvā satthā me bhante bhagavā sāvakohamasmīti vatvā ekatālaṃ dvitālanti yāva sattatālappamāṇaṃ Sattakkhattuṃ vehāsaṃ abbhuggantvā oruyha tathāgataṃ vanditvā ekamantaṃ nisīdi. Taṃ pāṭihāriyaṃ disvā mahājano aho mahānubhāvo buddho evaṃ thāmagatadiṭṭhiko nāma attānaṃ arahāti maññamāno uruvelakassapopi diṭṭhijālaṃ bhinditvā tathāgatena damitoti satthu guṇakathaṃyeva kathesi. Bhagavā nāhaṃ idāneva uruvelakassapaṃ damemi atītepi esa mayā damitoyevāti imissā atthuppattiyā mahānāradakassapajātakaṃ kathetvā cattāri saccāni pakāsesi. Magadharājā ekādasanahutehi saddhiṃ sotāpattiphale patiṭṭhāsi. Ekanahutaṃ upāsakattaṃ paṭivedesi. Rājā satthu santike nisinnoyeva pañca assāsake pavedetvā saraṇaṃ gantvā svātanāya nimantetvā āsanā vuṭṭhāya bhagavantaṃ padakkhiṇaṃ katvā pakkāmi. Punadivase yehi ca bhagavā diṭṭho yehi ca adiṭṭho sabbepi rājagahavāsino aṭṭhārasakoṭisaṅkhā manussā tathāgataṃ daṭṭhukāmā pātova rājagahato laṭṭhivanaṃ agamaṃsu. Tigāvuto maggo nappahosi. Sakalaṃ laṭṭhivanuyyānaṃ nirantaraṃ phuṭṭhaṃ ahosi. Mahājano dasabalassa rūpasobhaggappattaṃ attabhāvaṃ passanto tittiṃ kātuṃ nāsakkhi. Vaṇṇarūpino nāmesā evarūpesupi ṭhānesu tathāgatassa lakkhaṇānubyañjanādippabhedā sabbāpi rūpakāyasiri vaṇṇetabbā. Evaṃ rūpasobhaggappattaṃ dasabalassa sarīraṃ passamānena mahājanena nirantaraṃ phuṭṭho uyyāne ca magge ca ekabhikkhussapi nikkhamanokāso nāhosi. Taṃ divasaṃ kira bhagavato chinnabhattaṃ bhaveyya taṃ mā ahosīti sakkassa nisinnāsanaṃ uṇhākāraṃ dassesi. So Āvajjamāno taṃ kāraṇaṃ ñatvā māṇavakavaṇṇaṃ abhinimminitvā buddhadhammasaṅghapaṭisaṃyuttā thutiyo vadamāno dasabalassa purato otaritvā devānubhāvena okāsaṃ katvā

danto dantehi saha purāṇajaṭilehi vippamuttehi

siṅginikkhasuvaṇṇo rājagahaṃ pāvisi bhagavā.