Dasavāso dasabalo dasadhammavidū dasahi ca upeto

so dasasataparivāro rājagahaṃ pāvisi bhagavāti imāhi gāthāhi satthu vaṇṇaṃ vadamāno purato pāyāsi. Mahājano māṇavakassa rūpasiriṃ disvā ativiya abhirūpo ayaṃ māṇavako na kho panamhehi diṭṭhapubboti cintetvā kuto ayaṃ māṇavako kassa vā ayanti āha. Taṃ sutvā māṇavako

yo dhīro sabbadhī danto seṭṭho appaṭipuggalo

arahaṃ sugato loke tassāhaṃ paricārikoti gāthaṃ āha. Satthā sakkena katokāsaṃ maggaṃ paṭipajjitvā bhikkhusahassaparivuto rājagahaṃ pāvisi. Rājā buddhappamukhassa saṅghassa mahādānaṃ datvā ahaṃ bhante tīṇi ratanāni vinā vattituṃ na sakkhissāmi velāya vā avelāya vā bhagavato santikaṃ āgamissāmi Laṭṭhivanuyyānañca nāma atidūre idaṃ pana amhākaṃ veḷuvanannāma uyyānaṃ nātidūre nāccāsanne gamanāgamanasampannaṃ buddhārahaṃ senāsanaṃ imaṃ me bhagavā paṭiggaṇhātūti suvaṇṇabhiṅgārena pupphagandhavāsitaṃ maṇivaṇṇaṃ udakaṃ ādāya veḷuvanaṃ uyyānaṃ pariccajanto dasabalassa hatthe udakaṃ pāpesi. Tasmiṃ ārāmapaṭiggahaṇe buddhasāsanassa mūlāni otiṇṇānīti mahāpaṭhavī kampi. Jambūdīpasmiṃ hi ṭhapetvā veḷuvanaṃ aññaṃ paṭhaviṃ kampetvā gahitasenāsanannāma natthi. Tāmbapaṇṇidīpepi ṭhapetvā mahāvihāraṃ aññaṃ paṭhaviṃ kampetvā gahitasenāsanannāma natthi. Satthā veḷuvanārāmaṃ paṭiggahetvā rañño anumodanaṃ katvā uṭṭhāyāsanā bhikkhusaṅghaparivuto veḷuvanaṃ agamāsi.