Tasmiṃ kho pana samaye sārīputto moggallāno cāti dvepi paribbājakā rājagahaṃ upanissāya viharanti amataṃ pariyesamānā. Tesu sārīputto assajittheraṃ piṇḍāya paviṭṭhaṃ disvā pasannacitto payirupāsitvā ye dhammā hetuppabhavāti gāthaṃ sutvā sotāpattiphale patiṭṭhāya attano sahāyakassa moggallānassa paribbājakassāpi tameva gāthaṃ abhāsi. Sopi sotāpattiphale patiṭṭhahi. Te ubhopi sañjayaṃ oloketvā attano parisāya saddhiṃ satthu santike pabbajitvā tesu mahāmoggallāno sattāhena arahattaṃ pāpuṇi sārīputtatthero aḍḍhamāsena. Ubhopi jane aggasāvakaṭṭhāne ṭhapesi sārīputtattherena arahattappattadivaseyeva ca sāvakasannipātaṃ akāsi.
Tathāgate pana tasmiññeva veḷuvanuyyāne viharante suddhodanamahārājā putto kira me cha vassāni dukkarakārikaṃ caritvā paramābhisambodhiṃ patvā pavattitapavaradhammacakko rājagahaṃ nissāya veḷuvane viharatīti sutvā aññataraṃ amaccaṃ āmantesi ehi bhaṇe purisasahassaparivāro rājagahaṃ gantvā mama vacanena pitā te suddhodanamahārājā daṭṭhukāmoti vatvā puttaṃ me gaṇhitvā ehīti āha. So evaṃ devāti rañño vacanaṃ sirasā sampaṭicchitvā purisasahassaparivāro khippameva saṭṭhiyojanamaggaṃ gantvā dasabalassa catuparisamajjhe nisīditvā dhammadesanavelāya vihāraṃ pāvisi. So tiṭṭhatu tāva rañño pahitasāsananti parisapariyante ṭhito satthu dhammadesanaṃ sutvā yathāṭhitova saddhiṃ purisasahassena arahattaṃ patvā pabbajjaṃ yāci. Bhagavā etha bhikkhavoti hatthaṃ pasāresi. Sabbe taṃ khaṇaṃyeva iddhimayapattacīvaradharā vassasatikattherā viya ahesuṃ. Arahattappattakālato paṭṭhāya pana ariyā nāma majjhattāva honti. Tasmā rañño pahitasāsanaṃ dasabalassa na kathesi. Rājā neva gatova āgacchati na sāsanaṃ suyyati ehi bhaṇe tvaṃ gacchāti teneva niyāmena aññaṃ amaccaṃ pesesi. Sopi gantvā purimanayeneva saddhiṃ parisāya arahattaṃ patvā tuṇhī ahosi. Rājā eteneva niyāmena purisasahassaparivāre nava amacce pesesi. Sabbe attano kiccaṃ niṭṭhāpetvā tuṇhībhūtā tattheva vihariṃsu. Rājā sāsanamattaṃpi āharitvā ācikkhantaṃ alabhitvā cintesi ettakā Ca janā mayi sinehābhāvena sāsanamattaṃpi na paccāhariṃsu ko nu kho me vacanaṃ karissatīti sabbarājabalaṃ olokento kāḷudāyiṃ addasa. So kira rañño sabbatthasādhako amacco abbhantariko ativiyavissāsiko bodhisattena saddhiṃ ekadivase jāto sahapaṃsukīḷako sahāyo. Atha naṃ rājā āmantesi tāta udāyi ahaṃ mama puttaṃ passitukāmo nava purisasahassāni pesesiṃ ekapurisopi āgantvā sāsanamattaṃ ārocentopi natthi dujjāno kho pana me jīvitantarāyo ahaṃ jīvamāno ca puttaṃ duṭṭhuṃ icchāmi sakkhissasi nu kho me puttaṃ dassetunti. Sakkhissāmi deva sace pabbajituṃ labhissāmīti. Tāta tvaṃ pabbajitvā vā apabbajitvā vā mama puttaṃ dassehīti āha. So sādhu devāti rañño sāsanaṃ ādāya rājagahaṃ gantvā satthu dhammadesanavelāya parisapariyante ṭhito dhammaṃ sutvā saparivāro arahattaphalaṃ patvā ehibhikkhubhāve patiṭṭhāsi.