samayo mahāvīra bhagī rasānaṃ

nāsītisītaṃ nātiuṇhaṃ nātidubbhikkhachātakaṃ

saddalā haritā bhūmi esa kālo mahāmunīti saṭṭhimattāhi gāthāhi dasabalassa kulanagaragamanatthāya gamanavaṇṇaṃ vaṇṇesi. Atha naṃ satthā kinnu kho udāyi madhurassarena gamanavaṇṇaṃ vaṇṇesīti āha. Bhante tumhākaṃ pitā suddhodanamahārājā passitukāmo karotha ñātakānaṃ saṅgahanti. Sādhu udāyi karissāmi ñātakānaṃ saṅgahaṃ bhikkhusaṅghassa ārocehi gamikavattaṃ pūressantīti. Sādhu bhanteti thero ārocesi.

Bhagavā aṅgamagadhavāsīnaṃ kulaputtānaṃ dasahi sahassehi kapilavatthuvāsīnaṃ dasahi sahassehīti sabbeheva vīsatisahassehi khīṇāsavabhikkhūhi parivuto rājagahā nikkhamitvā divase divase yojanamaggaṃ gacchati. Rājagahato saṭṭhiyojanaṃ kapilavatthuṃ dvīhi māsehi pāpuṇissāmīti aturitacārikaṃ pakkāmi. Theropi bhagavato nikkhantabhāvaṃ ārocessāmīti vehāsaṃ abbhuggantvā rañño nivesane pāturahosi. Rājā theraṃ disvā tuṭṭhacitto mahārahe pallaṅke nisīdāpetvā attano paṭiyāditassa nānaggarasabhojanassa pattaṃ pūretvā adāsi. Thero uṭṭhāya gamanākāraṃ dassesi. Nisīditvā bhuñja tātāti. Satthu santikaṃ gantvā bhuñjissāmi mahārājāti. Kahaṃ pana tāta satthāti. Vīsatisahassabhikkhuparivāro tumhākaṃ dassanatthāya cārikaṃ nikkhanto mahārājāti. Rājā tuṭṭhamānaso āha tumhe imaṃ paribhuñjitvā yāva mama putto imaṃ nagaraṃ pāpuṇāti tāvassa ito ca piṇḍapātaṃ harathāti. Thero adhivāsesi. Rājā theraṃ parivisitvā pattaṃ gandhacuṇṇena ubbattetvā uttamabhojanassa pūretvā tathāgatassa dethāti therassa hatthe patiṭṭhāpesi. Thero sabbesaṃ passantānaṃyeva pattaṃ ākāse khipitvā sayaṃpi vehāsaṃ abbhuggantvā piṇḍapātaṃ āharitvā satthu hattheva ṭhapesi. Satthā taṃ paribhuñji. Etenupāyena thero divase divase āhari. Satthāpi antarāmagge raññoyeva piṇḍapātaṃ paribhuñji. Theropi bhattakiccāvasāne divase divase ajja ettakaṃ bhagavā āgato ajja ettakanti buddhaguṇapaṭisaṃyuttāya ca dhammakathāya sakalarājakulaṃ satthu dassanaṃ vināyeva satthari sañjātaṃ pasādaṃ akāsi. Teneva naṃ bhagavā etadaggaṃ bhikkhave mama sāvakānaṃ kulappasādakānaṃ yadidaṃ kāḷudāyīti etadagge ṭhapesi.