Sākiyāpi kho anuppatte bhagavati amhākaṃ ñātiseṭṭhaṃ Passissāmāti sannipatitvā bhagavato vasanaṭṭhānaṃ vīmaṃsamānā nigrodhasakkassa ārāmo ramaṇīyoti sallakkhetvā tattha sabbaṃ paṭijagganavidhiṃ kāretvā gandhapupphahatthā paccuggamanaṃ karontā sabbālaṅkārapaṭimaṇḍite daharadahare nāgaradārake ca nāgaradārikāyo ca paṭhamaṃ pahiṇiṃsu tato rājakumāre ca rājakumāriyo ca tesaṃ antarā sāmaṃ gandhapupphacuṇṇādīhi pūjayamānā bhagavantaṃ gahetvā nigrodhārāmameva agamaṃsu. Tattha bhagavā vīsatisahassakhīṇāsavaparivuto paññattapavarabuddhāsane nisīdi. Sākiyā nāma mānajātikā mānatthaddhā. Te siddhatthakumāro amhehi daharataro amhākaṃ kaniṭṭho bhāgineyyo putto nattāti cintetvā daharadahare rājakumāre āhaṃsu tumhe bhagavantaṃ vandatha mayaṃ tumhākaṃ piṭṭhito nisīdissāmāti.
Tesu evaṃ avanditvā nisinnesu bhagavā tesaṃ ajjhāsayaṃ oloketvā na maṃ ñātayo vandanti handāhaṃ te vandāpessāmīti abhiññāpādakaṃ catutthajjhānaṃ samāpajjitvā vuṭṭhāya ākāsaṃ abbhuggantvā tesaṃ sīse pādapaṃsuṃ okiramāno viya gaṇḍāmbarukkhamūle yamakapāṭihāriyasadisaṃ pāṭihāriyaṃ akāsi. Rājā taṃ acchariyaṃ disvā āha bhagavā tumhākaṃ jātadivase isikāḷadevalassa vandanatthaṃ upanītānaṃ vo pāde parivattetvā brāhmaṇassa matthake patiṭṭhite disvāpi ahaṃ tumhe vandiṃ ayaṃ me paṭhamavandanā vappamaṅgaladivase jambūchāyāya sirisayane nipannānaṃ vo jambūchāyāya parivattanaṃ disvāpi pāde vandiṃ ayaṃ me dutiyavandanā idāni imaṃ adiṭṭhapubbaṃ pāṭihāriyaṃ Disvāpi tumhākaṃ pāde vandāmi ayaṃ me tatiyavandanāti. Raññe pana vandite bhagavantaṃ avanditvā ṭhātuṃ samattho nāma ekasākiyopi nāhosi. Sabbe vandiṃsuyeva. Iti bhagavā ñātayo vandāpetvā ākāsato otaritvā paññatte āsane nisīdi. Nisinne bhagavati sikhāppatto ñātisamāgamo ahosi. Sabbe ekaggacittā hutvā nisīdiṃsu. Tato mahāmegho pokkharavassaṃ vassi. Tāmbavaṇṇaṃ udakaṃ heṭṭhā viravantaṃ gacchati. Temitukāmo ca temeti atemitukāmassa sarīre ekavindumattopi na patati. Taṃ disvā sabbe acchariyabbhutajātā aho acchariyaṃ aho abbhutanti kathaṃ samuṭṭhāpesuṃ. Satthā na idāneva mayhaṃ ñātisamāgame pokkharavassaṃ vassati atītepi vassīti imissā atthuppattiyā vessantarajātakaṃ kathesi. Dhammadesanaṃ sutvā sabbe uṭṭhāya vanditvā pakkamiṃsu. Ekopi rājā vā rājamahāmatto vā sve amhākaṃ bhikkhaṃ gaṇhathāti vatvā gato nāma natthi.