Dhammañcare sucaritaṃ na taṃ duccaritaṃ care
dhammacārī sukhaṃ seti asmiṃ loke paramhi cāti imaṃ pana gāthaṃ sutvā sakadāgāmiphale patiṭṭhāsi dhammapālajātakaṃ sutvā anāgāmiphale patiṭṭhāsi maraṇasamaye setacchattassa heṭṭhā sirisayane nipannoyeva arahattaṃ pāpuṇi. Araññāvāsena padhānānuyogakiccaṃ rañño nāhosi. Sotāpattiphalaṃ sacchikatvāyeva pana bhagavato pattaṃ gahetvā saparisaṃ bhagavantaṃ mahāpāsādaṃ āropetvā paṇītena khādanīyena bhojanīyena parivisi. Bhattakiccapariyosāne sabbaṃ itthāgāraṃ āgantvā bhagavantaṃ vandi ṭhapetvā rāhulamātaraṃ. Sā pana gaccha ayyaputtaṃ vandāhīti parijanena vuccamānāpi sace mayhaṃ guṇo atthi sayameva me santikaṃ ayyaputto āgamissati āgatameva naṃ vandissāmīti na agamāsi. Bhagavā rājānaṃ pattaṃ Gāhāpetvā dvīhi aggasāvakehi saddhiṃ rājadhītāya sirigabbhaṃ gantvā rājadhītā yathāruciṃ vandamānā na kiñci vattabbāti vatvā paññatte āsane nisīdi. Sā vegenāgantvā gopphakesu gahetvā pādapiṭṭhiyaṃ sīsaṃ parivattetvā yathājjhāsayaṃ vandi. Rājā rājadhītāya bhagavati sinehabahumānādiguṇasampattiṃ kathesi bhante mama dhītā tumhehi kāsāyāni vatthāni nivāsitānīti sutvā tato paṭṭhāya kāsāvavatthā jātā tumhākaṃ ekabhattikabhāvaṃ sutvā ekabhattikāva jātā tumhehi mahāsayanassa chaḍḍitabhāvaṃ sutvā paṭṭikamañcakeyeva nipannā tumhākaṃ mālāgandhādīhi virahitabhāvaṃ ñatvā virahitamālāgandhāva jātā attano ñātakesu mayaṃ paṭijaggissāmāti sāsane pesite ekaṃ ñātakaṃpi na olokesi evaṃ guṇasampannā me bhagavā dhītāti. Anacchariyaṃ mahārāja yaṃ idāni tayā rakkhiyamānā rājadhītā paripakke ñāṇe attānaṃ rakkheyya esā pubbe anārakkhā pabbatapāde vicaramānā aparipakke ñāṇe attānaṃ rakkhatīti vatvā tassā sokaṃ vinodetvā candakinnarījātakaṃ kathetvā sotāpattiphalaṃ datvā uṭṭhāyāsanā pakkāmi. Dutiyadivase nandassa rājakumārassa abhisekagehappavesanavivāhamaṅgalesu vattamānesu tassa gehaṃ gantvā kumāraṃ pattaṃ gāhāpetvā pabbājetukāmo maṅgalaṃ vatvā uṭṭhāyāsanā pakkāmi. Janapadakalyāṇī kumāraṃ gacchantaṃpi disvā tuvaṭaṃ kho ayyaputta āgaccheyyāsīti vatvā gīvaṃ pasāretvā olokesi. Sopi bhagavantaṃ pattaṃ gaṇhathāti vattuṃ Avisahamāno vihāraṃyeva agamāsi. Taṃ anicchamānaṃyeva bhagavā pabbājesi. Iti bhagavā kapilapuraṃ gantvā tatiyadivase nandaṃ pabbājesi.