Sattame divase rāhulamātā kumāraṃ alaṅkaritvā bhagavato santikaṃ pesesi passa tāta evaṃ vīsatisahassasamaṇaparivutaṃ suvaṇṇavaṇṇaṃ brahmarūpavaṇṇaṃ samaṇaṃ ayaṃ te pitā etassa mahantā nidhiyo ahesuṃ tyāssa nikkhamanato paṭṭhāya na passāmi gaccha taṃ dāyajjaṃ yāca ahaṃ tāta kumāro abhisekaṃ patvā cakkavatti bhavissāmi dhanena me attho dhanaṃ me dehi sāmiko hi putto pitu santakassāti. Kumāro bhagavato santikaṃ gantvāva pitu sinehaṃ paṭilabhitvā haṭṭhacittova sukhā te samaṇa chāyāti vatvā aññaṃ bahuṃ attano anurūpaṃ vadanto aṭṭhāsi. Bhagavā katabhattakicco anumodanaṃ katvā uṭṭhāyāsanā pakkāmi. Kumāropi dāyajjaṃ me samaṇa dehi dāyajjaṃ me samaṇa dehīti bhagavantaṃ anubandhi. Bhagavā kumāraṃ na nivattāpesi. Parijano bhagavatā saddhiṃ gacchantaṃ nivattetuṃ nāsakkhi. Iti so bhagavatā saddhiṃ ārāmameva agamāsi. Tato bhagavā cintesi yaṃ ayaṃ pitusantakaṃ dhanaṃ icchati taṃ vaṭṭānugataṃ savighātaṃ handassa bodhimaṇḍe paṭiladdhaṃ sattavidhaṃ ariyadhanaṃ demi lokuttaradāyajjassa sāmikaṃ karomīti āyasmantaṃ sārīputtaṃ āmantesi tenahi tvaṃ sārīputta rāhulakumāraṃ pabbājehīti. Pabbajite pana kumāre rañño adhimattaṃ dukkhaṃ uppannaṃ. Taṃ adhivāsetuṃ asakkonto Bhagavato nivedetvā sādhu bhante ayyā mātāpitūhi ananuññātaṃ puttaṃ na pabbājeyyunti varaṃ yāci. Bhagavā tassa taṃ vacanaṃ paṭissuṇitvā punadivase rājanivesane katapātarāso ekamantaṃ nisinnena raññā bhante tumhākaṃ dukkarakārakakāle ekā devatā maṃ upasaṅkamitvā putto te kālakatoti āha tassā vacanaṃ asaddahanto na mayhaṃ putto bodhiṃ appatvā kālaṃ karotīti taṃ paṭipakkhipinti vutte idāni kiṃ saddahissatha ye tumhe pubbepi aṭṭhikāni dassetvā putto te matoti vutte na saddahitthāti imissā atthuppattiyā mahādhammapālajātakaṃ kathesi. Gāthāpariyosāne rājā anāgāmiphale patiṭṭhahi. Iti bhagavā pitaraṃ tīsu phalesu patiṭṭhāpetvā bhikkhusaṅghaparivuto punadeva rājagahaṃ gantvā sītavane vihāsi.