atīte gandhāraraṭṭhe bodhisatto gandhārarañño putto hutvā Pitu accayena rajje patiṭṭhāya dhammena rajjaṃ kāresi. Majjhimadesepi videharaṭṭhe videho nāma rājā rajjaṃ kāresi. Tepi dve rājāno adiṭṭhasahāyā hutvā aññamaññaṃ thiravissāsā ahesuṃ. Tadā manussā dīghāyukā honti tiṃsavassasahassāni jīvanti. Athekadā gandhārarājā puṇṇamuposathadivase samādinnasīlo hutvā mahātale paññattapavarapallaṅkamajjhagato vivaṭena sīhapañjarena pācīnalokadhātuṃ olokento amaccānaṃ dhammatthayuttakathaṃ kathento nisīdi. Tasmiṃ khaṇe gaganatale abhilaṅghantamiva paripuṇṇacandamaṇḍalaṃ rāhu avatthari. Candappabhā antaradhāyi. Amaccā candālokaṃ apassantā candassa rāhunā gahitabhāvaṃ rañño ārocesuṃ. Rājā candaṃ oloketvā ayaṃ cando āgantukaupakkilesena upakkiliṭṭho nippabho jāto mayhaṃpesa rājaparivāro upakkilesova na kho pana me taṃ paṭirūpaṃ yvāhaṃ rāhunā gahitacando viya nippabho bhaveyyaṃ visuddhe gaganatale vicarantaṃ candamaṇḍalamiva rajjaṃ pahāya pabbajissāmi kiṃ me parena ovaditena kule ca gaṇe ca alaggo hutvā attānameva ovadanto vicarissāmi idaṃ me paṭirūpanti cintetvā yaṃ icchatha taṃ rājānaṃ karothāti rajjaṃ amaccānaṃ niyyādesi. Tasmiṃ gandhāraraṭṭhe rājā rajjaṃ chaḍḍetvā isipabbajjaṃ pabbajitvā jhānābhiññā nibbattetvā jhānaratisamappito himavantappadese vāsaṃ kappesi. Videharājāpi sukhaṃ me sahāyassa raññoti vāṇije pucchitvā tassa pabbajitabhāvaṃ sutvā mama sahāye pabbajite ahaṃ rajjena kiṃ karissāmīti Sattayojanike mithilanagare rajjaṃ tiyojanasatike videharaṭṭhe soḷasasu gāma- sahassesu pūritapūritāni koṭṭhāgārāni soḷasasahassā nāṭakitthiyo chaḍḍetvā puttadhītaro amanasikaritvā himavantappadesaṃ pavisitvā pabbajitvā pavattaphalabhojano hutvā samaggavāsaṃ vasanto vicari. Te ubhopi samavattācāraṃ carantā aparabhāge samāgacchiṃsu na pana aññamaññaṃ sañjāniṃsu sammodamānā ekatova samavattācāraṃ cariṃsu. Tadā videhatāpaso gandhāratāpasassa upaṭṭhānaṃ karoti. Tesaṃ ekasmiṃ puṇṇamīdivase aññatarasmiṃ rukkhamūle nisīditvā dhamma- yuttakathaṃ kathentānaṃ gaganatale virocamānaṃ candamaṇḍalaṃ rāhu avatthari. Videhatāpaso kinnu kho candassa pabhā naṭṭhāti oloketvā rāhunā gahitaṃ candaṃ disvā ko nu kho esa ācariya candaṃ avattharitvā nippabhamakāsīti pucchi. Antevāsika ayaṃ rāhu nāma candasseko upakkileso virocituṃ na deti ahaṃpi rāhuggahitaṃ candamaṇḍalaṃ disvā idaṃ parisuddhaṃ candamaṇḍalaṃ āgantukupakkilesena nippabhaṃ jātaṃ mayhaṃpi idaṃ rajjaṃ upakkileso yāva maṃ candamaṇḍalaṃ rāhu viya nippabhaṃ na karoti tāva pabbajissāmīti cintetvā tadeva rāhuggahitaṃ candamaṇḍalaṃ ārammaṇaṃ katvā mahārajjaṃ chaḍḍetvā pabbajitoti. Ācariya tvaṃ gandhārarājāti. Āma ahanti. Ācariya ahaṃpi videharaṭṭhe mithilanagare videharājā nāma nanu mayaṃ aññamaññaṃ adiṭṭhasahāyakāti. Kiṃ pana te ārammaṇaṃ ahosīti. Ahaṃ tumhe pabbajitāti sutvā addhā pabbajjāya mahantaṃ guṇaṃ addasāti tumheyeva ārammaṇaṃ Katvā rajjaṃ pahāya pabbajitoti. Te tato paṭṭhāya ativiya samaggā sammodamānā pavattaphalabhojanā hutvā vicariṃsu. Tattha dīgharattaṃ vasitvā ca pana loṇambilasevanatthāya himavantato otaritvā ekaṃ paccantagāmaṃ pāpuṇiṃsu. Manussā tesaṃ iriyāpathe pasīditvā bhikkhaṃ datvā paṭiññaṃ gahetvā araññe rattiṭṭhānādīni māpetvā vasāpesuṃ antarāmaggepi nesaṃ bhattakiccakaraṇatthāya udakaphāsukaṭṭhāne paṇṇasālaṃ kāresuṃ. Te paccantagāme bhikkhaṃ caritvā tāya paṇṇasālāya nisīditvā paribhuñjitvā attano vasanaṭṭhānaṃ gacchanti. Tepi tesaṃ manussā āhāraṃ dadamānā ekadā loṇaṃ patte pakkhipitvā denti ekadā paṇṇapuṭe bandhitvā denti ekadā aloṇakāhārameva denti. Te tesaṃpi ekadivasaṃ paṇṇapuṭe bahutaraṃ loṇaṃ adaṃsu. Videhatāpaso loṇaṃ ādāya gantvā bodhisattassa bhattakiccakāle pahonakaṃ datvā attanopi pamāṇayuttaṃ gahetvā atirekaṃ paṇṇapuṭe bandhitvā aloṇadivase bhavissatīti tiṇavaṭṭikaantare ṭhapesi. Athekadivasaṃ aloṇake āhāre laddhe vedeho gandhārassa bhikkhābhājanaṃ datvā tiṇavaṭṭikaantarato loṇaṃ āharitvā ācariya loṇaṃ gaṇhathāti āha. Ajja manussehi loṇaṃ na dinnaṃ tvaṃ kuto labhīti. Ācariya purimadivasaṃ manussā bahuṃ loṇamadaṃsu athāhaṃ aloṇakadivase bhavissatīti atirekaṃ loṇaṃ ṭhapesinti. Atha naṃ bodhisatto moghapurisa tiyojanasatikaṃ videharaṭṭhaṃ pahāya pabbajitvā akiñcanabhāvaṃ patvā idāni loṇasakkharāya taṇhaṃ janesīti tajjitvā Ovadanto paṭhamaṃ gāthamāha