Tattha ambāhamaddanti ambarukkhaṃ ahaṃ addasaṃ. Vanamantarasminti vanaantare ambavanamajjheti attho. Saṃvirūḷhanti saṃvaḍḍhitaṃ. Tamaddasanti taṃ uyyānato nikkhamanto phalahetu vibhaggaṃ puna addasaṃ. Taṃ disvāti taṃ phalahetu vibhaggaṃ disvā paṭiladdha- saṃvego paccekabodhiñāṇaṃ nibbattetvā imaṃ bhikkhācariyapabbajjaṃ upagatosmi tasmā bhikkhācariyaṃ carāmi. Idaṃ so phalahetu vibhaggaambarukkhadassanakālato paṭṭhāya sabbaṃ cittavāraṃ kathesi. Sesānaṃ visajjanesupi eseva nayo ayaṃ panettha anuttānapadavaṇṇanā. Selanti maṇivalayaṃ. Naravīduniṭṭhitanti vīranarehi niṭṭhitaṃ paṇḍitapurisehi katanti attho. Yuganti ekekasmiṃ ekekaṃ katvā ekaṃ valayayugalaṃ. Dijā dijanti gahitamaṃsapiṇḍaṃ dijaṃ avasesadijā. Kuṇapamāharantanti maṃsapiṇḍaṃ ādāya harantaṃ. Sameccāti samāgantvā sannipatitvā. Paripātayiṃsūti koṭetvā anubandhiṃsu. Usabhāhamaddanti usabhaṃ ahaṃ addasaṃ. Valakkakunti valakkakudhaṃ.
Bodhisatto ekekaṃ gāthaṃ sutvā sādhu bhante tumhākamevetaṃ ārammaṇaṃ anurūpanti ekekassa paccekabuddhassa thutiṃ akāsi. Tañca pana catūhi janehi desitaṃ dhammakathaṃ sutvā gharāvāse anapekkho hutvā paccekabuddhesu gatesu bhuttapātarāso sukhanisinno bhariyaṃ āmantetvā bhadde ete cattāro paccekabuddhā rajjaṃ pahāya pabbajitvā akiñcanā apalibodhā pabbajjāsukhena vītināmenti ahaṃ pana bhatiyā jīvitaṃ kappemi kiṃ me gharāvāsena tvaṃ puttake Saṃgaṇhantī gehe vasāti vatvā gāthadvayamāha
karakaṇḍaṃ kaliṅgānaṃ gandhārānañca naggaji
nimirājā videhānaṃ pañcālānañca dummukho