anusāsito me na bhaveyya pacchā

ahaṃpi ekā carissāmi bhaggava

sakuṇīva muttā purisassa hatthāti.

Tattha anusāsito me na bhaveyya pacchāti anusāsako ovādako na bhaveyya dullabhattā ovādakānaṃ tasmā ayameva pabbajitakālo na hi añño atthīti dasseti. Sakuṇīva muttāti yathā sākuṇikena gahetvā sakuṇapacchiyaṃ khittāsu sakuṇīsu tassa hatthato muttā ekā sakuṇī anilapathaṃ laṅghitvā yathārucitaṃ ṭhānaṃ gantvā ekikāva careyya tathā ahaṃpi tava hatthato muttā ekikā carissāmīti sayaṃpi pabbajitukāmā hutvā evamāha.