Bodhisatto tassā kathaṃ sutvā tuṇhī ahosi. Sā pana bodhisattaṃ vañcetvā puretaraṃ pabbajitukāmā sāmi pānīyatitthaṃ Gamissāmi dārake olokehīti ghaṭaṃ ādāya titthaṃ gacchantī viya palāyitvā nagarasāmante tāpasānaṃ santikaṃ gantvā pabbaji. Bodhisatto tassā anāgamanaṃ ñatvā sayaṃ dārake posesi. Aparabhāge tesu thokaṃ vaḍḍhitvā attano ayānassa jānanasamatthataṃ sampattesu tesaṃ vīmaṃsanatthaṃ ekadivasaṃ bhattaṃ pacanto thokaṃ uttaṇḍulaṃ paci ekadivasaṃ thokaṃ kilinnaṃ ekadivasaṃ supakkaṃ ekadivasaṃ aloṇakaṃ ekadivasaṃ atiloṇakaṃ. Dārakā tāta ajja bhattaṃ uttaṇḍulaṃ ajja kilinnaṃ ajja supakkaṃ ajja aloṇakaṃ ajja atiloṇakanti kathesuṃ. Bodhisatto ajja āmaṃ tātāti vatvā cintesi ime dārakā idāni āmapakkaloṇaatiloṇakāni jānanti attano dhammatāya jīvituṃ sakkhissanti mayā pabbajituṃ vaṭṭatīti. Atha te dārake ñātakānaṃ datvā paṭicchāpetvā ammatāta ime dārake sādhukaṃ posethāti vatvā so ñātakānaṃ paridevantānaṃyeva nagarā nikkhamitvā isipabbajjaṃ pabbajitvā nagarasāmanteyeva vasi. Atha naṃ ekadivasaṃ bārāṇasiyaṃ bhikkhāya carantaṃ paribbājikā disvā taṃ vanditvā ayya dārakā te nāsitā maññeti āha. Mahāsatto nāhaṃ dārake nāsemi tesaṃ attano ayānassa jānanakāle pabbajitomhi tvaṃ tesaṃ acintetvā pabbajjāya abhiramāti vatvā osānagāthamāha

āmaṃ pakkañca jānanti atho loṇaṃ aloṇakaṃ

tamahaṃ disvāna pabbajiṃ careva tvaṃ carāmihanti.

Tattha tamahanti taṃ ahaṃ dārakānaṃ kiriyaṃ disvā pabbajito. Careva tvaṃ carāmihanti tvaṃpi bhikkhācariyameva cara ahaṃpi bhikkhācariyameva carissāmīti.