Bodhisatto tassā kathaṃ sutvā tvaṃ mā soci ahaṃ rañño kathetvā tava yasaṃ pākatikaṃ karissāmīti taṃ samassāsetvā nagaraṃ pavisitvā bhuttapātarāso rañño santikaṃ gantvā kathaṃ samuṭṭhāpetvā mahārāja nanu tumhākaṃ asukā nāma oṭṭhibyādhi asukaṭṭhāne ca asukaṭṭhāne ca ure sallaṃ bandhitvā saṅgāmaṃ nittharati asukadivasaṃ nāma gīvāya paṇṇaṃ bandhitvā pesitā yojanasataṃ agamāsi tumhepissā mahantaṃ yasaṃ adattha sā Idāni kahanti. Tamahaṃ kumbhakārassa gomayāharaṇatthāya adāsinti. Atha naṃ bodhisatto ayuttaṃ kho mahārāja tumhākaṃ kataṃ kumbhakārassa yānake yojanatthāya dātunti vatvā rañño ovādavasena catasso gāthā abhāsi

yāvatāsiṃsatī poso tāvadeva pavīṇati

atthāpāye jahantī naṃ oṭṭhibyādhiṃva khattiyo.

Yo pubbe katakalyāṇo katattho nāvabujjhati