1 apaṇṇakajātakaṃ
imaṃ tāva apaṇṇakadhammadesanaṃ bhagavā sāvatthiṃ upanissāya jetavanamahāvihāre viharanto kathesi. Kaṃ pana ārabbha ayaṃ kathā samuṭṭhitāti. Seṭṭhissa sahāyake pañcasate titthiyasāvaketi.
Ekasmiṃ hi divase anāthapiṇḍiko seṭṭhī attano sahāyake pañcasate aññatitthiyasāvake ādāya bahumālāgandhavilepanañceva telamadhuphāṇitavatthacchādanāni ca gāhāpetvā jetavanaṃ gantvā bhagavantaṃ vanditvā gandhamālādīhi pūjetvā bhesajjāni ceva vatthāni ca bhikkhusaṅghassa vissajjetvā cha nisajjadose vajjetvā ekamantaṃ nisīdi. Tepi aññatitthiyasāvakā tathāgataṃ vanditvā satthu puṇṇacandasassirīkaṃ mukhaṃ lakkhaṇānubyañjanapaṭimaṇḍitaṃ byāmappabhāparikkhittaṃ brahmakāyaṃ āveḷāveḷā yamakayamakā hutvā niccharantiyo ghanabuddharaṃsiyo olokayamānā anāthapiṇḍikassa samīpeyeva nisīdiṃsu. Atha nesaṃ satthā manosilātale sīhanādaṃ nadanto taruṇasīho viya Gajjento pāvussakamegho viya ākāsagaṅgaṃ otārento viya ratanadāmaṃ ganthento viya ca aṭṭhaṅgasamannāgatena savanīyena brahmassarena nānānayavicittaṃ madhuradhammakathaṃ kathesi. Te satthu dhammadesanaṃ sutvā pasannacittā uṭṭhāya dasabalaṃ vanditvā aññatitthiyasaraṇaṃ bhinditvā buddhasaraṇaṃ agamaṃsu. Te tato paṭṭhāya niccakālaṃ anāthapiṇḍikena saddhiṃ gandhamālādihatthā vihāraṃ gantvā dhammaṃ suṇanti dānaṃ denti sīlaṃ rakkhanti uposathakammaṃ karonti. Atha bhagavā sāvatthito punadeva rājagahaṃ agamāsi. Te tathāgatassa gatakāle taṃ saraṇaṃ bhinditvā puna aññatitthiyasaraṇaṃ gatā attano mūlaṭṭhāneyeva patiṭṭhitā. Bhagavāpi sattaṭṭhamāse vītināmetvā puna jetavanameva agamāsi. Anāthapiṇḍiko punapi te ādāya satthu santikaṃ gantvā satthāraṃ gandhamālādīhi pūjetvā vanditvā ekamantaṃ nisīdi. Tepi bhagavantaṃ vanditvā ekamantaṃ nisīdiṃsu. Atha nesaṃ anāthapiṇḍiko tathāgate cārikaṃ pakkante gahitasaraṇaṃ bhinditvā puna aññatitthiyasaraṇameva gahetvā mūle patiṭṭhitabhāvaṃ bhagavato ārocesi. Bhagavā aparimitakappakoṭiyo nirantarapavattitavacīsucaritānubhāvena dibbagandhagandhīnaṃ nānāgandhapūritaṃ ratanakaraṇḍakaṃ vivaranto viya mukhamaṇḍalaṃ vivaritvā madhurassaraṃ nicchārento saccaṃ kira tumhe upāsakā tīṇi saraṇāni bhinditvā aññatitthiyasaraṇaṃ gatāti pucchi. Atha tehi paṭicchādetuṃ asakkontehi saccaṃ bhagavāti vutte satthā upāsakā heṭṭhā avīciṃ upari bhavaggaṃ paricchedaṃ katvā tiriyaṃ aparimāṇāsu lokadhātūsu Sīlādīhi guṇehi buddhena sadiso nāma natthi kuto adhikataroti yāvatā bhikkhave sattā apadā vā dvipadā vā catuppadā vā bahuppadā vā .pe. Tathāgato tesaṃ aggamakkhāyati yaṅkiñci vittaṃ idha vā huraṃ vā .pe. Aggato ve pasannānanti ādīhi suttehi pakāsite ratanattayaguṇe pakāsetvā evaṃ uttamaguṇasamannāgataṃ ratanattayaṃ saraṇaṃ gatā upāsakā vā upāsikā vā nirayādīsu nibbattanakā nāma natthi apāyanibbattito pana muccitvā devaloke uppajjitvā mahāsampattiṃ anubhonti kasmā tumhehi evarūpaṃ saraṇaṃ bhinditvā aññatitthiyasaraṇaṃ gacchantehi ayuttaṃ katanti āha.