ayaṃ vā so mato seti allapitaṃva vicchito

bhumyā nipatito seti amarā vata kuñjareti.

Tattha ayaṃ vāti vibhāvanattho vāsaddo. Ayameva so na aññoti taṃ vibhāvento evamāha. Allapitanti māluvalatāya aggapavālaṃ. Vicchitoti vicchinno gimhakāle majjhantikasamaye tattavālikapuline nakhena chinditvā pātito māluvalatāya aṅkuro viyāti vuttaṃ hoti. Bhumyāti bhūmiyaṃ. Amarā vatāti amato vata. Amarītipi pāṭho.

Tasmiṃ khaṇe sakko lokaṃ olokento taṃ disvā ayaṃ tāpaso puttadāraṃ pahāya pabbajito idāni hatthipotake puttasaññaṃ katvā paridevati saṃvejetvā naṃ satiṃ paṭilabhāpessāmīti tassa assamapadaṃ āgantvā ākāse ṭhitova tatiyaṃ gāthamāha