so eko bahu socati dhūmakārīva brāhmaṇoti.

Tattha bahutendoti bahutaindano. Dhūmaṃ akāsīti makkhikapari- panthaharaṇatthāya aggiñca dhūmañca akāsi. Vāseṭṭhoti tassa gottaṃ. Atanditoti analaso hutvā. Taṃdhūmagandhenāti tena Dhūmagandhena. Sarabhāti sarabhamigā. Makasadditāti makasehi upaddūtā pīḷitā. Sesamakkhikāpi makasaggahaṇeneva gahitā. Vassāvāsanti tassa santike vassārattavāsaṃ vasiṃsu. Manaṃ katvāti sinehaṃ uppādetvā. Nāvabujjhathāti araññato caritvā vajaṃ āgacchantīti ca vajato araññaṃ gacchantīti ca ettakā āgatā ettakā na āgatāti na jānāti. Tassa tā vinassunti tassa tā evaṃ apaccavekkhantassa sīhaparipanthādito arakkhiyamānā ajā sīhaparipanthādīhi vinassiṃsu sabbā vā vinaṭṭhā. Nadīnaṃ pabhavāni cāti pabbateyyānaṃ nadīnaṃ pabhavaṭṭhānāni ca paviṭṭhā. Vibhavanti abhavaṃ. Ajā ca vināsaṃ pattā disvā jānitvā. Kiso vivaṇṇoti khīrādidāyikā ajā pahāya sarabhe saṅgaṇhitvā tepi apassanto ubhato parihīno sokābhibhūto kiso ceva dubbaṇṇo ca ahosi. Evaṃ yo sanniraṃkatvāti evameva mahārāja yo sakaṃ porāṇaṃ ajjhattikajanaṃ nīharitvā pahāya kismiñci agaṇetvā āgantukaṃ piyaṃ karoti so tumhādiso eko bahu socati ayaṃ te mayā dassito dhūmakārī brāhmaṇo viya bahuṃ socatīti.

Evaṃ mahāsatto rājānaṃ saññāpentopi kathesi. Sopi saññattiṃ katvā tassa pasīditvā bahudhanaṃ adāsi. Tato paṭṭhāya ajjhattikasaṅgahameva karonto dānādīni puññāni katvā saggaparāyano ahosi.

Satthā imaṃ dhammadesanaṃ āharitvā jātakaṃ samodhānesi tadā korabyarājā ānando ahosi dhūmakārī pasenadikosalo vidhūrapaṇḍito pana ahamevāti.