tenamhi evañjalitānubhāvā
vaṇṇo ca me sabbadisā pabhāsatīti evamādīni vimānāni āharitabbāni.
Dhanadhaññāti muttādidhanañca satta dhaññāni ca. Paṭhavī ca kevalāti sakalā cesā mahāpaṭhavī. Sakalapaṭhaviṃ hatthagataṃ maññamāno vadati. Passa phalaṃ kummāsapiṇḍiyāti attano dānaphalaṃ attanova dassento evamāha. Dānaphalaṃ kira bodhisatto ca sabbaññubuddhā ceva jānanti. Teneva ca satthā itivuttake suttaṃ kathento Evañce bhikkhave sattā jāneyyuṃ dānasaṃvibhāgassa vipākaṃ yathāhaṃ jānāmi tasmā na adatvā bhuñjeyyuṃ na ca nesaṃ maccheramalaṃ cittaṃ pariyādāya tiṭṭheyya yopi nesaṃ carimo ālopo carimaṃ kabalaṃ tatopi na asaṃvibhajitvā bhuñjeyyuṃ sace nesaṃ paṭiggāhakā assu yasmā ca kho bhikkhave sattā na evaṃ jānanti dānasaṃvibhāgassa vipākaṃ yathāhaṃ jānāmi tasmā adatvā bhuñjanti maccheramalañ ca tesaṃ cittaṃ pariyādāya tiṭṭhatīti.
Bodhisattopi attano chattamaṅgaladivase sañjātapītipāmojjo imāhi dvīhi gāthāhi udānagītaṃ gāyi. Tato paṭṭhāya rañño piyagītanti bodhisattassa nāṭakitthiyo ca sesanāṭakagandhabbādayopi ca antepurajanopi antonagaravāsinopi bahinagaravāsinopi pānāgāresupi samajjamaṇḍalesupi amhākaṃ rañño piyagītanti tadeva gītaṃ gāyanti. Evaṃ addhāne gate aggamahesī tassa gītassa atthaṃ jānitukāmā ahosi. Mahāsattaṃ pana pucchituṃ na visahati. Athassā ekasmiṃ guṇe pasīditvā ekadivasaṃ rājā bhadde varante dammi varaṃ gaṇhāhīti. Sā sādhu deva varaṃ gaṇhāmīti. Hatthiassādīsu te kiṃ dammīti. Deva tumhe nissāya na mayhaṃ kiñci natthi na me etehi attho sace varaṃ dātukāmattha tumhākaṃ gītassa atthaṃ kathetvā dethāti. Bhadde ko tava iminā varena attho aññaṃ gañhāhīti. Deva aññena me attho natthi etadeva gaṇhāmīti. Sādhu bhadde kathessāmi tuyhaṃ pana ekikāya raho na kathemi Dvādasayojanikāya bārāṇasiyā bheriñcārāpetvā rājadvāre ratanamaṇḍapaṃ kāretvā ratanapallaṅkaṃ paññāpetvā amaccabrāhmaṇādīhi nagarehi ceva soḷasahi ca itthīsahassehi parivuto tesaṃ majjhe ratanapallaṅke nisīditvā kathessāmīti. Sā sādhu devāti sampaṭicchi. Rājā tathā kāretvā marugaṇaparivuto sakko devarājā viya mahājanakāya- parivuto ratanapallaṅke nisīdi. Devīpi sabbālaṅkārapaṭimaṇḍitā kāñcanabhaddapīṭhaṃ attharitvā ekamante akkhikoṭiyā oloketvā yathārūpe ṭhāne nisīditvā deva tumhākaṃ tussitvā gāyanamaṅgalagītassa tāva me atthaṃ gaganatale candaṃ uṭṭhāpento viya pākaṭaṃ katvā kathethāti vatvā tatiyaṃ gāthamāha