Tattha vatumanti maggaṃ. Ariyācaritanti ariyehi buddhādīhi āciṇṇaṃ. Sukosaleti sobhane kosalarañño sudhīteti attho. Arahantoti kilesehi ārakattā arānañca arīnañca hatattā paccayānaṃ arahatattā evaṃladdhanāmā paccekabuddhā. Idaṃ vuttaṃ hoti bhadde kosalarājadhīte sohaṃ dānaṃ me dinnanti tittiṃ akatvā punappunaṃ tadeva ariyācaritaṃ dānamaggaṃ ācarissāmi. Mayhaṃ hi aggadakkhiṇeyyattā arahanto manāpā dassanā cīvarādīnaṃ dātukāmatā teyeva passituṃ icchāmīti.

Idañca pana vatvā rājā deviyā sampattiṃ oloketvā Bhadde mayā tava purimabhave attano kusalakammaṃ vitthāretvā kathitaṃ imāsaṃ pana nārīnaṃ majjhe rūpena vā līḷāvilāsena vā tayā sadisī ekāpi natthi sā tvaṃ kiṃ kammaṃ katvā imaṃ sampattiṃ paṭilabhasīti pucchanto puna gāthamāha

devī viya accharūpamā

majjhe nārigaṇassa sobhasi