Tattha tatheva tvaṃ avedasīti tatheva tvaṃ aññāsi. Avañci pitaraṃ mamāti tvaṃ hi mama pitaraṃ nahāyituṃ gacchāmāti vissāsetvā Nahāyantaṃ māretvā khaṇḍākhaṇḍikaṃ chinditvā nikkhanitvā sace koci jānissati mayhaṃpi evarūpaṃ bhayaṃ āgamissatīti vañcesi idaṃ kho pana maraṇabhayaṃ idāni tavāgatanti.

Iti vatvā naṃ tattheva jīvitakkhayaṃ pāpetvā nikkhanitvā sākhāya paṭicchādetvā khaggaṃ dhovitvā nahātvā paṇṇasālaṃ gantvā māritabhāvaṃ purohitassa kathetvā mātaraṃ paribhāsi. Idha kiṃ karissāmāti tayopi janā bārāṇasimeva agamaṃsu. Bodhisatto kaniṭṭhassa uparajjaṃ datvā dānādīni puññāni katvā saggapadaṃ pūresi.

Satthā imaṃ dhammadesanaṃ āharitvā saccāni pakāsetvā jātakaṃ samodhānesi tadā pitārājā devadatto ahosi purohito ānando puttarājā pana ahamevāti.

Parantapajātakaṃ ekādasamaṃ.