Bodhisattopi kho bālasatthavāhaputtassa nikkhantadivasato paṭṭhāya Māsaḍḍhamāsaṃ vītināmetvā pañcahi sakaṭasatehi saddhiṃ nagarato nikkhamma anupubbena kantāramukhaṃ pāpuṇi. So tattha udakacāṭiyo pūretvā bahuṃ udakaṃ ādāya antokhandhāvāre bheriñcārāpetvā manusse sannipātetvā evamāha ambho maṃ anāpucchitvā pasatamattaṃpi udakaṃ mā āsiñcittha kantāre visarukkhā nāma honti pattaṃ vā pupphaṃ vā phalaṃ vā tumhehi pure ca akhāditapubbaṃ maṃpi anāpucchitvā mā khāditthāti. Evaṃ manussānaṃpi ovādaṃ datvā pañcahi sakaṭasatehi kantāraṃ paṭipajji. Tasmiṃ kantāramajjhe sampatte so yakkho purimanayeneva bodhisattassa paṭipathe attānaṃ dassesi. Bodhisatto taṃ disvāva aññāsi imasmiṃyeva kantāre udakaṃ natthi nirudakakantāro nāmeso ayañca nibbhayo rattanetto chāyāpissa na paññāyati nissaṃsayaṃ iminā purato gato bālasatthavāhaputto sabbaṃ udakaṃ chaḍḍāpetvā kilametvā sapariso khādito bhavissati mayhaṃ pana paṇḍitabhāvaṃ upāyakosallaṃ na jānāti maññeti. Tato naṃ āha gacchatha tumhe mayaṃ bāṇijā nāma aññaṃ udakaṃ adisvā gahitaudakaṃ na chaḍḍema diṭṭhaṭṭhāne pana chaḍḍetvā sakaṭāni sallahukāni katvā gamissāmāti. Yakkhopi thokaṃ gantvā adassanaṃ upagamma attano yakkhanagarameva gato. Yakkhe pana gate sabbe manussā bodhisattaṃ upagantvā āhaṃsu ayya ete manussā esā nīlavanarāji paññāyati tato paṭṭhāya nibaddhaṃ devo vassatīti vatvā uppalakumudamālino padumapuṇḍarīkakalāpe ādāya bhisamūlāni khādantā allavatthā allakesā udakabindūhi ceva Kalalehi ca paggharantehi āgatā udakaṃ chaḍḍetvā sallahukehi sakaṭehi khippaṃ gacchāmāti. Bodhisattopi tesaṃ vacanaṃ sutvā sakaṭāni ṭhapāpetvā sabbe manusse sannipātāpetvā tumhehi imasmiṃ kantāre saro vā pokkharaṇī vā atthīti kassaci sutapubbanti pucchi. Na ayya sutapubbanti. Nirudakakantāro nāma eso idāni ekacce manussā etāya nīlavanarājiyā purato devo vassatīti vadanti vuṭṭhivāto nāma kittakaṃ ṭhānaṃ vāyatīti. Tiyojanamattaṃ ayyāti. Kiṃ pana vo ekassāpi sarīraṃ vuṭṭhivāto paharatīti. Natthi ayyāti. Meghasīsannāma kittake ṭhāne paññāyatīti. Tiyojanamatte ayyāti. Atthi pana vo kenaci ekaṃ meghasīsaṃ diṭṭhanti. Natthi ayyāti. Vijjulatā nāma kittake ṭhāne paññāyatīti. Catupañcayojane ayyāti. Atthi pana vo kenaci vijjulatobhāso diṭṭhoti. Natthi ayyāti. Meghasaddo nāma kittake ṭhāne suyyatīti. Ekadviyojane ayyāti. Atthi pana vo kenaci meghasaddo suyyatīti. Natthi ayyāti. Kiṃ tumhe ete jānāthāti. Na jānāma ayyāti. Na ete manussā yakkhā ete amhe udakaṃ chaḍḍāpetvā dubbale katvā khādituṃ āgatā bhavissanti purato gato bālasatthavāhaputto anupāyakusalo addhā so etehi udakaṃ chaḍḍāpetvā kilametvā khādito bhavissati pañca sakaṭasatāni yathāpūritāneva ṭhitāni bhavissanti ajja mayaṃ tāni passissāma pasatamattampi udakaṃ achaḍḍetvā sīghaṃ sīghaṃ sakaṭāni pājethāti. So āgacchanto yathāpūritāneva Pañca sakaṭāni goṇānaṃ manussānaṃ ca hanukaṭṭhikādīni disāvidisāsu vippakiṇṇāni disvā sakaṭāni mocāpetvā sakaṭaparivattakena khandhāvāraṃ bandhāpetvā sakālasseva manusse ca goṇe ca sāyamāsabhattaṃ bhojāpetvā manussānaṃ majjhe goṇe nipajjāpetvā sayaṃ balanāyake gahetvā khaggahattho tiyāmarattiṃ ārakkhaṃ ṭhapetvā ṭhitakova aruṇaṃ uṭṭhāpesi. Punadivase pātova sabbakiccāni niṭṭhāpetvā goṇe bhojetvā dubbalasakaṭāni chaḍḍāpetvā thirasakaṭāni gāhāpetvā appagghaṃ bhaṇḍaṃ chaḍḍāpetvā mahagghabhaṇḍaṃ āropetvā yathāicchiticchitaṭṭhānaṃ gantvā dviguṇatiguṇena mūlena bhaṇḍaṃ vikkiṇitvā sabbaṃ parisaṃ ādāya puna attano nagarameva agamāsi.