idaṃ pure ninnamāhu bahumacchaṃ mahodakaṃ

āvāso bakarājassa pettikaṃ bhavanaṃ mama

tyajja bhekena yāpema okaṃ na vijjahāmhaseti.

Tattha idanti maṅgalapokkharaṇiṃ sandhāya vadati. Sā hi pubbe udakagumbena udake pavisante mahodakā bahumacchā idāni pana udakassa pacchinnattā na mahodakā jātā. Tyajja bhekenāti te mayaṃ ajja macche alabhantā maṇḍūkamattena yāpema. Okanti evaṃ jighacchāya pīḷitāpi vasanaṭṭhānaṃ na jahāma.