Satthā imaṃ dhammakathaṃ kathetvā evaṃ gahapati pubbe takkagāhino mahāvināsaṃ pattā apaṇṇakagāhino pana amanussānaṃ hatthato muccitvā sotthinā icchiticchitaṭṭhānaṃ gantvā punapi sakaṭṭhānameva paccāgamiṃsūti dvepi vatthūni ghaṭento imissā apaṇṇakadhammadesanāya abhisambuddho hutvā imaṃ gāthamāha

apaṇṇakaṭṭhānameke dutiyaṃ āhu takkikā

etadaññāya medhāvī taṃ gaṇhe yadapaṇṇakanti.

Tattha apaṇṇakanti ekaṃsikaṃ aviruddhaṃ niyyānikaṃ. Ṭhānanti kāraṇaṃ. Kāraṇasmiṃ hi yasmā tadāyattavuttitāya phalaṃ tiṭṭhati nāma tasmā taṃ ṭhānanti vuccati ṭhānañca ṭhānato aṭṭhānañca aṭṭhānatoti ādīsu cassa payogo veditabbo. Iti apaṇṇakaṭṭhānanti Padadvayenāpi yaṃ ekantahitasukhāvahaṃ taṃ paṇḍitehi paṭipannaṃ ekaṃsikakāraṇaṃ sobhaṇakāraṇaṃ apaṇṇakannāma aviruddhakāraṇaṃ niyyānikakāraṇaṃ idanti dīpeti. Ayamettha saṅkhepo. Pabhedato pana tīṇi saraṇagamanāni pañca sīlāni aṭṭha sīlāni dasa sīlāni pāṭimokkhasaṃvaro indriyasaṃvaro ājīvapārisuddhisīlasaṃvaro paccayapaṭisevanaṃ sabbaṃpi catupārisuddhisīlaṃ indriyesu guttadvāratā bhojanesu mattaññutā jāgariyānuyogo jhānaṃ vipassanā abhiññā samāpatti ariyamaggo ariyaphalaṃ sabbampetaṃ apaṇṇakaṭṭhānaṃ apaṇṇakapaṭipadā niyyānikapaṭipadāti attho.