Tattha apekkhiyānāti apekkhitvā jānitvā. Idaṃ vuttaṃ hoti tāta paṭhavissaro rājā nāma ahaṃ bhusaṃ kuddho balavakodhābhibhūtoti ñatvā aṭṭhavatthukādibhedaṃ daṇḍaṃ parassa na paneyya na pavatteyya kiṃkāraṇā kuddho hi aṭṭhavatthukaṃ soḷasavatthukaṃ katvā aṭṭhānena akāraṇena attano rājabhāvassa ananurūpaṃ imaṃ ettakaṃ nāma āharāpetha idaṃ vāssa karothāti parassa bhusaṃ dukkhāni balavadukkhāni udīreyya. Yatoti yadā. Idaṃ vuttaṃ hoti yadā pana rājā parasmiṃ uppannaṃ attano pasādaṃ jāneyya atha parassa dukkaṭaṃ atthaṃ niyuñjeyya upaparikkheyya tadā evaṃ niyuñjanto ayaṃ nāmettha attho ayameva tassa dosoti sayaṃ attapaccakkhaṃ katvā athassa aparādhakārakassa aṭṭhavatthukahetu aṭṭheva soḷasa- vatthukahetu soḷaseva kahāpaṇe gaṇhanto daṇḍaṃ sadisaṃ katadosānurūpaṃ nivesaye ṭhapeyya pavatteyyāti. Amucchitoti chandādivasena agatikilesehi amucchito anabhibhūto hutvā yo nayānayaṃ nayati upaparikkhati so neva paraṃ jhāpeti na attānaṃ. Chandādivasena hi ahetukaṃ daṇḍaṃ pavattento parampi tena daṇḍena jhāpeti ḍahati pīḷeti attānampi tatonidānena pāpena ayaṃ panevaṃ Paraṃ jhāpeti attānaṃ. Yo daṇḍadharo bhavatīdha issaroti yo idha paṭhavissaro jāto idha sattaloke dosānucchavikaṃ daṇḍaṃ pavattento daṇḍadharo hoti. Sa vaṇṇaguttoti guṇavaṇṇena ceva yasavaṇṇena ca gutto rakkhito siriyā na dhaṃsati na parihāyati. Avaṇṇasaṃyuttāva jahantīti adhammikā lolarājāno avaṇṇena yuttā hutvā jīvitaṃ jahanti. Dhamme ca ye ariyappavediteti ye rājāno ācāraariyehi dhammikarājūhi pavedite dasavidhe rājadhamme ratā. Anuttarā teti te vacasā manasā kammunā ca tīhipi etehi anuttarā jeṭṭhakā. Te santisoraccasamādhisaṇṭhitāti te agatipahānena kilesasantiyañca susīlayasaṅkhāte soracce ca ekaggatāsamādhimhi ca saṇṭhitā patiṭṭhitā dhammikarājāno. Vajanti lokaṃ dubhayanti dhammena rajjaṃ kāretvā manussalokato devalokaṃ devalokato manussalokanti ubhayalokameva vajanti nirayādīsu na nibbattanti. Narapamudānanti narānañca pamudānañca. Ṭhapemi attānanti kuddhopi kodhavasena agantvā attānaṃ porāṇakarājūhi ṭhapitanayasmiṃyeva ṭhapemi vinicchayadhammaṃ na bhindāmi.