Tattha ātappāti vatthukāmakilesakāmā purisaṃ hi te ātapanti tasmā ātappāti vuttā. Atthā hi vividhāti mahārāja mayhaṃ vatthukāmakilesakāme nissāya kattabbā nānākiccasaṅkhātā vividhā atthā atthi te maṃ tapanti na ātapoti.
Ath naṃ rājā ko nāma te atthoti pucchi. So āha ahaṃ deva dakkhiṇadvāre kapaṇitthiyā saddhiṃ saṃvāsaṃ kappayiṃ sā maṃ chaṇakīḷaṃ sāmi kīḷissāma atthi te kiñci hattheti pucchi atha Naṃ ahaṃ mama nidhānaṃ uttaradvāre pākārantare ṭhapitanti avacaṃ sā gaccha taṃ āhara ubhopi kīḷissāmāti maṃ pahiṇi sā me tassā kathā hadayaṃ na vijahati taṃ maṃ anussarantaṃ kāmātapo tapati ayaṃ me deva atthoti. Atha evarūpaṃ vātātapaṃ agaṇetvā kinte tussanakāraṇaṃ yena gāyanto gacchasīti. Deva taṃ nidhānaṃ āharitvā tāya saddhiṃ abhiramissāmīti iminā kāraṇena tuṭṭho gāyāmīti. Kiṃ pana bho purisa uttaradvāre ṭhapitanidhānaṃ satasahassamattaṃ atthīti. Natthi devāti. Tenahi paññāsasahassāni cattāḷīsa tiṃsa vīsati dasa pañca cattāri tayo dve eko kahāpaṇo aḍḍho pādo cattāro māsakā tayo dve eko māsakoti pucchi. Sabbaṃ paṭikkhipitvā aḍḍhamāsakoti vutte āma deva ettakaṃ mayhaṃ dhanaṃ taṃ āharitvā tāya saddhiṃ abhiramissāmīti gacchāmi tāya pītiyā tena somanassena na maṃ esa vātātapo tapatīti. Atha naṃ rājā bho purisa evarūpe ātape tattha mā gami ahante aḍḍhamāsakaṃ dassāmīti āha. Deva tumhākaṃ kathāya ṭhatvā tañca gaṇhissāmi itarañca na nāsessāmi mama gamanaṃ ahāpetvā tampi gahessāmīti. Bho puriso nivatta māsakaṃ te dassāmi dve māsaketi evaṃ vaḍḍhetvā koṭiṃ koṭisataṃ aparimitaṃ dhanaṃ dassāmi nivattāti vuttepi deva taṃ gahetvā itarampi gaṇhissāmicceva āha. Tato seṭṭhiṭṭhānādīhi ṭhānantarehi palobhito yāva oparajjā tatheva vatvā upaḍḍharajjaṃ te dassāmi nivattāti vutte sampaṭicchi. Rājā gaccha mama sahāyassa massuṃ kāretvā nahāpetvā alaṅkaritvā ānetha nanti amacce āṇāpesi. Āmaccā tathā akaṃsu. Rājā rajjaṃ dvidhā bhinditvā tassa upaḍḍharajjaṃ dāpesi. So pana taṃ gahetvāpi aḍḍhamāsakapemena uttarapassaṃ gatoyevāti vadanti. So aḍḍhamāsakarājā nāma ahosi. Te samaggā sammodamānā rajjaṃ kārentā ekadivasaṃ uyyānaṃ gamiṃsu. Tattha kīḷitvā udayarājā aḍḍhamāsakarañño aṅke sīsaṃ katvā nipajji. Tasmiṃ niddaṃ okkante parivāramanussā kīḷānubhavanavasena tattha tattha agamaṃsu. Aḍḍhamāsakarājā kiṃ me niccakālaṃ upaḍḍharajjena imaṃ māretvā ahaṃeva rajjaṃ kāressāmīti khaggaṃ abbahitvā paharissāmi nanti cintetvā puna ayaṃ rājā maṃ daliddaṃ kapaṇamanussaṃ attanā samānaṃ katvā mahante issariye patiṭṭhāpesi evarūpaṃ nāma yasadāyakaṃ māretuṃ mama icchā uppannā ayuttaṃ vata me katanti satiṃ paṭilabhitvā khaggaṃ pavesesi. Athassa dutiyampi tatiyampi tatheva cittaṃ uppajji. Tato cintesi idaṃ cittaṃ punappunaṃ uppajjamānaṃ pāpakamme yojeyyāti so asiṃ bhūmiyaṃ khipitvā rājānaṃ uṭṭhāpetvā khamāhi devāti pādesu pati. Nanu samma tava mamantare doso natthīti. Atthi mahārāja ahaṃ idaṃ nāma akāsinti. Tenahi samma khamāmi te icchanto pana rajjaṃ kārehi ahaṃ uparājā hutvā upaṭṭhahissāmīti. So na me deva rajjenattho ayaṃ hi taṇhā maṃ apāyesu nibbattāpessati tava rajjaṃ tvameva gaṇha Ahaṃ pabbajissāmi diṭṭhamme kāmassa mūlaṃ ayaṃ hi saṅkappentassa vaḍḍhati na dāni naṃ ito paṭṭhāya saṅkappessāmīti udānaṃ udānento catutthaṃ gāthamāha