Taṃ sutvā rājā bhīto korakalambakaṃ olokesi. Atha naṃ so mā bhāyi mahārāja nanu mayā paṭhamameva tumhākaṃ etaṃ kathitanti āha. Rājā kapilassa vacanaṃ sutvā attano kathitameva purato karonto tvaṃsi bhante kaniṭṭho jeṭṭho korakalambakoti āha. Athassa saha musāvādena cattāro devaputtā tādisassa musāvādino ārakkhaṃ na gaṇhissāmāti khagge pādamūle chaḍḍetvā antaradhāyiṃsu. Mukhaṃ bhinnakukkuṭaṇḍaṃ viya kāyo vivaṭavaccakuṭi viya duggandhaṃ vāyi. Ākāsato bhassitvā paṭhaviyaṃ patiṭṭhahati catassopi iddhiyo parihāyiṃsu. Atha naṃ ca mahāpurohito mā bhāyi mahārāja sace saccaṃ bhaṇissasi sabbante paṭipākatikaṃ karissāmīti vatvā tatiyaṃ gāthamāha

sace hi saccaṃ bhaṇasi hohi rāja yathā pure

musā ce bhāsase rāja bhūmiyaṃ tiṭṭha cetiyāti.

Tattha bhūmiyaṃ tiṭṭhāti bhūmiyaṃ deva patiṭṭha puna ākāsaṃ laṅghituṃ na sakkhissasīti attho.