aduṭṭhacitto bhāseyya giraṃ saccūpasañhitanti.

Tattha sa rājāti bhikkhave so cetiyo rājā pubbe antalikkhacaro hutvā pacchā isinā abhisatto parihīnasabhāvo hutvā attapariyāyaṃ attano kālapariyāyaṃ patvā paṭhaviṃ pāvisīti attho. Tasmāti yasmā cetiyarājā chandādigamanena avīciparāyano jāto tasmā. Aduṭṭhacittoti chandādīhi adūsitacitto hutvā saccameva bhāseyyāti.

Mahājano cetiyarājā isiṃ akkositvā musāvādaṃ katvā avīciṃ paviṭṭhoti bhayappatto ahosi. Rañño pañca puttā āgantvā brāhmaṇassa pādesu patitvā amhākaṃ avassayo hohīti vadiṃsu. Brāhmaṇo tātā tumhākaṃ pitā dhammaṃ nāsetvā musāvādaṃ katvā isiṃ akkositvā avīciṃ pavisanto dhammo nāmesa hato hanati tumhehi na sakkā idha vasitunti vatvā tesu sabbajeṭṭhakaṃ ehi tāta pācīnadvārena nikkhamitvā ujukameva gaccha gacchanto sabbasetaṃ sattappatiṭṭhitaṃ hatthiratanaṃ passissasi tāya saññāya tattha nagaraṃ māpetvā vasa taṃ nagaraṃ hatthipuraṃ nāma bhavissatīti āha. Dutiyaṃ āmantetvā tāta dakkhiṇadvārena nikkhamitvā ujukameva gaccha gacchanto sabbasetaṃ assaratanaṃ passissasi tāya saññāya tattha nagaraṃ māpetvā vasa taṃ nagaraṃ assapuraṃ nāma bhavissatīti āha. Tatiyaṃ āmantetvā tāta pacchimadvārena nikkhamitvā ujukameva gaccha gacchanto kesarasīhaṃ passissasi tāya saññāya tattha nagaraṃ māpetvā vasa taṃ nagaraṃ sīhapuraṃ nāma bhavissatīti āha. Catutthaṃ āmantetvā tāta uttaradvārena nikkhamitvā ujukameva gaccha gacchanto sabbaratanamayaṃ cakkapañjaraṃ passissasi tāya saññāya tattha nagaraṃ māpetvā vasa taṃ nagaraṃ uttarapañjaraṃ nāma bhavissatīti āha. Pañcamaṃ āmantetvā tāta tayā imasmiṃ ṭhāne vasituṃ na sakkā imasmiṃ nagare mahāthūpaṃ katvā nikkhamitvā pacchimuttarāya disāya ujukameva gaccha gacchanto dve pabbate aññamaññaṃ paharitvā daddhanti saddaṃ karonte passissasi tāya saññāya tattha nagaraṃ māpetvā vasa taṃ nagaraṃ daddhapuraṃ nāma bhavissatīti āha. Te pañcapi janā tāya saññāya gantvā tasmiṃ tasmiṃ ṭhāne nagarāni māpetvā vasiṃsu.