Tattha amittānaṃva hatthatthanti amittānaṃ hatthe atthaṃ vināsaṃ viya. Sīvīti rājānaṃ ālapati. Pappoti māmivāti mādiso pāpakamme pāpuṇāti attanova kammena vināsaṃ pāpuṇātīti vuttaṃ hoti. Kammanti kasikammādibhedaṃ ājīvasādhakaṃ kiccaṃ. Vijjanti nānappakārakaṃ hatthisippādikaṃ sippaṃ. Dakkheyyanti nānappakārena bhoguppādanena kosallaṃ. Vivāhanti āvāhavivāhasambaddhaṃ. Sīlamaddavanti pañcavidhasīlañceva muduvacanahitakāmapāpanīvāraṇakalyāṇamittatā ca so hi idha maddavoti adhippeto. Eteva yase hāpetvāti ete ettake yasadāyakadhamme hāpetvā. Nibbatto sehi kammehīti attano kammehi nibbatto. Idaṃ vuttaṃ hoti ahaṃ mahārāja imasmiṃ loke issariyadāyakaṃ kattabbayuttakaṃ kammaṃ akatvā sippaṃ asikkhitvā upāyena bhoge anuppādetvā āvāhavivāhaṃ akatvā sīlaṃ arakkhitvā maṃ akiccaṃ karontaṃ nīvāraṇasamatthe kalyāṇamitte abhajitvā ime ettake yasadāyakattā yaseti saṅkhyaṃ gate Lokappavattidhamme avahāpetvā chaḍḍetvā imaṃ araññaṃ pavisitvā sayaṃ katehi pāpakammehi idāni manussapeto hutvā nibbattosmīti. Sahassajīnovāti sahassajinapuriso viyāti attho. Sacāhaṃ sammā- paṭipajjitvā bhoge uppādeyyaṃ tehi anekasahassehi bhogehi jīnotipi attho. Aparāyanoti asaraṇo nippatīti attho. Ariyadhammāti sappurisadhammato. Yathā petoti yathā mato peto hutvā uppajjeyya jīvamānoyeva tathā manussapeto jātosmīti attho. Sukhakāme dukkhāpetvāti sukhakāme satte dukkhāpetvā. Sukhakāmotipi pāṭho. Sayaṃ sukhakāmo paraṃ dukkhāpetvāti attho. Āpannosmi padaṃ imanti imaṃ evarūpaṃ koṭṭhāsaṃ pattosmi pathantipi pāṭho. Idaṃ dukkhassa pathabhūtaṃ attabhāvaṃ pattosmīti attho. Ṭhito bhāṇumakāsivāti bhāṇumā vuccati aggi vītacchitaṅgārehi samantā parikiṇṇo viya sarīre uṭṭhitena mahāḍāhena ḍahanto kāyikacetasikasukhaṃ na vindāmīti vadati.
Evañca pana vatvā ahaṃ mahārāja sukhakāmo paraṃ dukkhāpetvā diṭṭheva dhamme manussapetosmi tasmā tvaṃ pāpakammaṃ mā kari attano nagaraṃ gantvā dānādīni puññāni karohīti āha. Rājā tathā katvā saggapadaṃ pūresi.