Tattha tividhoti eko kacchapalomamayena pupphena eko tūlena eko ubhayenāti evaṃ tippakāro. Hemantikaṃ pāvuraṇanti himapātasamaye pāvuraṇā bhavituṃ samattho. Atha nūna tadā siyāti atha tasmiṃ kāle mama tayā saddhiṃ ekaṃseneva saṃsaggo siyā. Evaṃ sabbattha pacchimapadaṃ yojetabbaṃ. Addhālo sukatoti abhirūhitvā yujjhantaṃ purisasataṃ dhāretuṃ yadā sakkoti evaṃ sukato. Paripāteyyunti palāpeyyuṃ. Aṅgāreti vītacchitaṅgārasaṇṭhāre. Vāsaṃ kappeyyunti ekekaṃ surāghaṭaṃ pivitvā mattā vaseyyuṃ. Bimboṭṭha- sampannoti bimbaphalasadisehi oṭṭhehi samannāgato. Sumukhoti suvaṇṇādāsasadisamukho. Pīhayeyyunti aññamaññassa sampattiṃ icchantā pīhayeyyuṃ patthayeyyuṃ. Mūlasapattānanti saṇhānaṃ Mūlasagacchapattānaṃ. Kulukoti eko khuddakasakuṇo. Sāmuddikanti samudde pakkhandikaṃ mahānāvaṃ. Sayantaṃ savaṭākaranti yantena ceva vaṭṭakārena ca saddhiṃ sabbaṃ sambhārayuttaṃ. Ceto ādāyāti yadā ca evarūpaṃ nāvaṃ khuddako gāmadārako hatthena gahetvā gaccheyyāti attho.

Iti mahāsatto iminā aṭṭhānaparikappena ekādasa gāthā abhāsi. Taṃ sutvā nagarasobhinī mahāsattaṃ khamāpetvā nagaraṃ gantvā rañño taṃ kāraṇaṃ ārocetvā attano jīvitaṃ yācitvā gaṇhi.

Satthā imaṃ dhammadesanaṃ āharitvā evaṃ bhikkhu mātugāmo nāma akataññū mittadubbhīti vatvā saccāni pakāsetvā jātakaṃ samodhānesi. Saccapariyosāne ukkaṇṭhitabhikkhu sotāpattiphale patiṭṭhahi. Tadā rājā ānando ahosi tāpaso pana ahamevāti.

Aṭṭhānajātakaṃ navamaṃ.