Sammāsambuddho imaṃ dhammadesanaṃ kathetvā abhisambuddhova hutvā imaṃ gāthamāha

idha ce naṃ virādhesi saddhammassa niyāmakaṃ

ciraṃ tvaṃ anutappesi serivāyaṃva bāṇijoti.

Tattha idha ce naṃ virādhesi saddhammassa niyāmakanti imasmiṃ sāsane evaṃ saddhammassa niyāmakasaṅkhātaṃ sotāpattimaggaṃ virādhesi ce yadi virādhesi viriyaṃ ossajjanto nādhigacchasi na paṭilabhasīti attho . Ciraṃ tvaṃ anutappesīti evaṃ sante tvaṃ dīghamaddhānaṃ socanto paridevanto sadā anutappessasi. Athavā ossaṭṭhaviriyatāya ariyamaggassa virādhitattā dīgharattaṃ nirayādīsu uppanno nānappakārāni dukkhāni anubhavanto anutappessasi kilamissasīti ayamettha attho. Kathaṃ. Serivāyaṃva bāṇijoti serivāti evaṃnāmako ayaṃ vāṇijo yathā. Idaṃ vuttaṃ hoti yathā pubbe serivā nāma bāṇijo Satasahassagghanikaṃ suvaṇṇapātiṃ labhitvā tassā gahaṇatthāya viriyaṃ akatvā tato parihīno anutappi evameva tvaṃpi imasmiṃ sāsane paṭiyattasuvaṇṇapātisadisaṃ ariyamaggaṃ ossaṭṭhaviriyatāya anadhigacchanto tato parihīno dīgharattaṃ anutappessasi sace pana viriyaṃ na ossajjissasi paṇḍitavāṇijo suvaṇṇapātiṃ paṭilabhati viya mama sāsane navavidhaṃpi lokuttaradhammaṃ paṭilabhissasīti.