Evampi idha vuḍḍhānaṃ yo vākyaṃ nāvabujjhati

atisīmacaro ditto gijjho vātītasāsano

sabbe byasanaṃ papponti akatvā vuḍḍhasāsananti.

Tattha parisaṅkupathoti saṅkupatho. Manussā hiraññasuvaṇṇatthāya gacchantā tasmiṃ padese khāṇuke koṭetvā tesu rajjuyo bandhitvā gacchanti tena so gijjhapabbate jaṅghamaggo saṅkupathoti vuccati. Gijjhapathoti gijjhapabbatamatthake mahāmaggo. Sanantanoti porāṇo. Tatrāsīti tasmiṃ gijjhapabbatamatthake saṅkupathe eko gijjho ahosi So jiṇṇake mātāpitaro posesi. Ajagaraṃ medanti ajagaramedaṃ. Accāhāsīti ativiya āhari. Bahuttatoti bahuttaso. Jānaṃ uccaṃ papātinanti putto te atiuccaṃ ṭhānaṃ laṅghatīti sutvā uccaṃ papāti ayanti jānanto. Tejasinti purisatejasampannaṃ. Dūragāminanti teneva tejena dūragāmiṃ. Pariplavattanti uppalinipattaṃ viya udake uppalavamānaṃ. Vijānahīti vijānāsi. Cakkaṃva parimaṇḍalanti tasmiṃ te padese ṭhitassa samuddena paricchinno jambudīpo cakkaṃva paññāyati tato ṭhānā nivattāhīti ovadanto evamāha. Uddhaṃ pattosīti pitu ovādaṃ akatvā ekadivasaṃ gijjhehi saddhiṃ uppatito te ohāya pitarā kathitaṭhānaṃ agamāsi. Olokayantoti taṃ ṭhānaṃ patvā heṭṭhā olokento. Vaṅkaṅgoti vaṅkagīvo. Yathassāsi pitussutanti yathāssa pitu santikā sutaṃ āsi tatheva addasa. Yathāssāsītipi pāṭho. Parameva pavattathāti pitarā akkhātaṭhānato paraṃ ativattantova. Tañca vātasikhā tikkhāti naṃ anovādakaṃ balimpi samānaṃ dijaṃ tikhiṇaverabbhavātasikhā accāhāsi atihari cuṇṇavicuṇṇaṃ akāsi. Nāsakkhātigatoti nāsakkhi atigato. Posoti satto. Anovādakareti tasmiṃ dije paṇḍitānaṃ ovādaṃ akaronte sabbepi te mahādukkhaṃ pāpuṇiṃsu. Akatvā vuḍḍhasāsananti vuḍḍhānaṃ hitakāmānaṃ vacanaṃ akatvā evameva byasanaṃ mahādukkhaṃ pāpuṇāti.