Atīte kāsiraṭṭhe bārāṇasiyaṃ brahmadatto nāma rājā ahosi. Tadā amhākaṃ bodhisatto tassa agghāpaniko ahosi. Hatthiassādīni ceva maṇisuvaṇṇādīni ca agghāpesi agghāpetvā bhaṇḍasāmikānaṃ bhaṇḍānurūpameva mūlaṃ dāpeti. Rājā pana luddho Hoti. So lobhapakatitāya evaṃ cintesi ayaṃ evaṃ agghāpento nacirasseva mama gehe dhanaṃ parikkhayaṃ gamissati aññaṃ agghāpanikaṃ karissāmīti. So sīhapañjaraṃ ugghāṭetvā rājaṅgaṇaṃ olokento ekaṃ gāmikamanussaṃ lolabālaṃ rājaṅgaṇena gacchantaṃ disvā esa mayhaṃ agghāpanikakammaṃ kātuṃ sakkhissatīti taṃ pakkosāpetvā sakkhissasi bhaṇe amhākaṃ agghāpanikakammaṃ kātunti āha. Sakkhissāmi devāti. Rājā attano dhanaṃ rakkhaṇatthāya taṃ bālaṃ agghāpanikakamme ṭhapesi. Tato paṭṭhāya so bālo hatthiassādīni agghāpento agghaṃ hāpetvā yathāruciyā kathesi. Tassa ṭhānantare ṭhitattā yaṃ so kathesi tameva mūlaṃ hoti. Tasmiṃ kāle uttarāpathato eko assabāṇijo pañca assasatāni ānesi. Rājā taṃ purisaṃ pakkosāpetvā asse agghāpesi. So pañcannaṃ assasatānaṃ ekataṇḍulanāḷiyā agghamakāsi katvā ca pana assabāṇijassa ekataṇḍulanāḷikaṃ dethāti vatvā asse assasālāyaṃ saṇṭhāpesi. Assabāṇijo porāṇakaagghāpanakassa santikaṃ gantvā taṃ pavuttiṃ ārocetvā idāni kiṃ kattabbanti pucchi. So āha tassa purisassa lañcaṃ datvā evaṃ pucchatha amhākaṃ tāva assā ekaṃ taṇḍulanāḷikaṃ agghanti ñātametaṃ tumhe pana nissāya taṇḍulanāḷiyā agghaṃ jānitukāmomhi sakkhissatha vo rañño santike ṭhatvā sā taṇḍulanāḷikā idannāma agghatīti vattunti sace sakkhissāmīti vadati taṃ gahetvā rañño santikaṃ gacchatha ahaṃpi tattha gamissāmīti. Assabāṇijo sādhūti bodhisattassa vacanaṃ sampaṭicchitvā agghāpanikassa lañcaṃ datvā tamatthaṃ ārocesi. So lañcaṃ labhitvāva sakkhissāmi taṇḍulanāḷiṃ agghāpetunti. Tenahi gacchāma rājakulanti taṃ ādāya rañño santikaṃ agamāsi. Bodhisattopi aññepi bahū amaccā agamaṃsu. Assabāṇijo rājānaṃ vanditvā ahaṃ deva pañcannaṃ assasatānaṃ ekataṇḍulanāḷiagghanabhāvaṃ jānāmi sā pana taṇḍulanāḷi kiṃ agghati agghāpanikaṃ pucchatha devāti pucchi. Rājā taṃ pavuttiṃ ajānanto ambho agghāpanika pañca assasatāni kiṃ agghantīti pucchi. Taṇḍulanāḷiṃ devāti. Hotu bhaṇe assā tāva taṇḍulanāḷiṃ agghanti sā pana kiṃ agghati taṇḍulanāḷikāti pucchi. So bālapuriso bārāṇasiṃ santarabāhiraṃ agghati taṇḍulanāḷikāti āha. So kira pubbe rājānaṃ anuvattento ekaṃ taṇḍulanāḷiṃ assānaṃ agghamakāsi puna bāṇijakassa hatthato lañcaṃ labhitvā tassā taṇḍulanāḷikāya bārāṇasiṃ santarabāhiraṃ agghamakāsi. Tadā pana bārāṇasiyā pākāraparikkhepo dvādasayojaniko ahosi. Imissā antarabāhiraṃ pana tiyojanasatikaṃ raṭṭhanti. Iti so bālo evaṃ mahantaṃ bārāṇasiṃ santarabāhiraṃ taṇḍulanāḷikāya agghamakāsi.