Tattha laddhā satasahassāni atirekāni visatīti tvaṃ uposathaṃ karitvā mātu santikā sahassaṃ gahetvā vohāraṃ karonto sahassañca Satasahassāni ca atirekāni vīsatisahassāni labhitvā. Nākarīti tena dhanena asantuṭṭho nāvāya samuddaṃ pavisanto samudde ādīnavaṃ kathetvā mātarā vāriyamānopi anukampakānaṃ ñātīnaṃ sammāvacanaṃ nākari sotāpannaṃ mātaraṃ paharitvā antaraṃ katvā nikkhantoyevāsīti dīpeti. Laṅghinti nāvaṃ ullaṅghanasamatthaṃ. Pakkhandīti pakkhantosi. Appasiddhikanti mandasiddhiṃ vināsabahulaṃ. Catubbhi aṭṭhāti atha taṃ nissāya ekadivasaṃ katassa uposathakammassa nissandena phalikavimāne catasso itthiyo labhitvā tato rajatavimāne aṭṭha maṇivimāne soḷasa kanakavimāne dvattiṃsa adhigatosīti. Aticchaṃ cakkamāsadoti atha tvaṃ yathā laddhena asantuṭṭho atra uttaritaraṃ labhissāmīti evaṃ laddhaṃ laddhaṃ atikkamanalolasaṅkhātāya aticchāya samannāgatattā aticcho pāpapuggalo tassa uposathakammassa khīṇattā dvattiṃsa itthiyo atikkamitvā imaṃ petanagaraṃ āgantvā tassa mātuppahāradānaakusalassa nissandena idaṃ cakkaṃ sampattosi. Atricchantipi pāṭho. Atra atra icchamānoti attho. Atricchātipi pāṭho. Atricchāyāti attho. Bhamatīti tassa te icchāhatassa posassa idaṃ cakkaṃ matthakaṃ piṃsamānaṃ idāni kumbhakāracakkaṃ viya matthake bhamatīti attho. Ye ca taṃ anugijjhantīti taṇhā nāmesā gacchantī uparupari visālā hoti samuddo viya duppūrā rūpādīsu tassa tassa icchanaicchāya vipattigāminī taṃ evarūpaṃ taṇhaṃ ye anugijjhanti giddhā gadhitā hutvā Punappunaṃ allīyanti. Te honti cakkadhārinoti te evaṃ gacchantā khuracakkaṃ dhārenti. Bahubhaṇḍanti mātāpitūnaṃ santakaṃ bahudhanaṃ ohāya. Magganti gantabbaṃ appasiddhikaṃ samuddamaggaṃ apaccavekkhitvā yathā tvaṃ paṭipanno evameva aññesaṃpi yesaṃ etaṃ asaṅkhātaṃ avīmaṃsitaṃ te yathā tvaṃ tatheva taṇhāvasikā hutvā dhanaṃ ohāya gamanamaggaṃ anapekkhitvā paṭipannā cakkadhārino honti. Kammaṃ samekkheyyāti tasmā paṇḍito puriso attanā kattabbaṃ kammaṃ sadosaṃ nu kho niddosanti samekkheyya paccavekkheyya. Vipulañca bhoganti attano dhammaladdhadhanarāsiṃpi samekkheyya. Nātivateyyāti taṃ tādisaṃ puggalaṃ idaṃ cakkaṃ na ativatteyya na avatthareyya. Nātivattetītipi pāṭho. Nāvattharatīti attho.