Atīte kāsiraṭṭhe bārāṇasiyaṃ brahmadatto rājā ahosi. Tadā bodhisatto tassa aggamahesiyā kucchimhi paṭisandhiṃ gaṇhi. Sā dasamāsesu paripuṇṇesu puttaṃ vijāyi. Tassa nāmagahaṇadivase mahissāsakumāroti nāmaṃ akaṃsu. Tassa ādhāvitvā paridhāvitvā vicaraṇakāle aññopi putto jāto. Tassa candakumāroti nāmaṃ akaṃsu. Tassa ādhāvitvā paridhāvitvā vicaraṇakāle bodhisattassa mātā kālamakāsi. Rājā aññaṃ aggamahesiṭṭhāne ṭhapesi. Sā rañño piyā ahosi manāpā. Sāpi saṃvāsamanvāya ekaṃ puttaṃ vijāyi. Suriyakumārotissa nāmaṃ akaṃsu. Rājā puttaṃ disvā tuṭṭhacitto bhadde puttassa te varaṃ dammīti āha. Devī taṃ varaṃ icchitakāle gahetabbaṃ katvā ṭhapesi. Sā putte vayappatte rājānaṃ āha deva nanu mayhaṃ puttassa jātakāle varo dinno puttassa me rajjaṃ dehīti. Rājā mayhaṃ dve puttā aggikkhandhā viya jalamānā vicaranti na sakkā tava puttassa rajjaṃ dātunti paṭikkhipitvā taṃ punappunaṃ yācamānameva disvā ayaṃ mayhaṃ puttānaṃ pāpakampi cinteyyāti putte pakkosāpetvā āha tātā ahaṃ suriyakumārassa jātakāle varaṃ adāsiṃ idānissa mātā Rajjaṃ yācati ahaṃ tassa na dātukāmo mātugāmo nāma pāpo tumhākaṃ pāpakaṃpi cinteyya tumhe araññaṃ pavisitvā mamaccayena kulasantake nagare rajjaṃ kāreyyāthāti roditvā kanditvā sīse cumbitvā uyyojesi. Te pitaraṃ vanditvā pāsādā orohante rājaṅgaṇe kīḷamāno suriyakumāro disvā taṃ kāraṇaṃ ñatvā ahampi bhātikehi saddhiṃ gamissāmīti tehi saddhiṃyeva nikkhami. Te himavantaṃ pavisiṃsu.
Bodhisatto maggā okkamma rukkhamūle nisīditvā suriyakumāraṃ āmantesi tāta suriya etaṃ saraṃ gantvā nhātvā ca pivitvā ca paduminipaṇṇehi amhākampi pānīyaṃ ānehīti. Tampana saraṃ vessavaṇassa santikā ekena dakarakkhasena laddhaṃ hoti. Vessavaṇo taṃ āha ṭhapetvā devadhammajānanakeyeva aññe imaṃ saraṃ otaranti te khādituṃ labhasi anotiṇṇe na labhasīti. Tato paṭṭhāya so rakkhaso ye taṃ saraṃ otaranti te devadhamme pucchitvā ye na jānanti te khādati. Atha kho suriyakumāro taṃ saraṃ gantvā avīmaṃsitvāva otarati. Atha naṃ so rakkhaso gahetvā devadhamme jānāsīti pucchi. So āma jānāmi devadhammo nāma candimasuriyāti āha. Atha naṃ tvaṃ devadhamme na jānāsīti udakaṃ pavesetvā attano vasanaṭṭhāne ṭhapesi. Bodhisattopi taṃ cirāyantaṃ disvā candakumāraṃ pesesi. Rakkhasopi taṃ gahetvā devadhamme jānāsīti pucchi. Āma jānāmi devadhammo nāma catasso disāti. Rakkhaso na tvaṃ devadhamme jānāsīti tampi gahetvā tattheva ṭhapesi. Bodhisatto tasmiṃ cirāyante ekena antarāyena bhavitabbanti sayampi tattha gantvā dvinnampi otaraṇapadavalañjaṃ disvā rakkhasapariggahitena iminā sarena bhavitabbanti khaggaṃ sannayhitvā dhanuṃ gahetvā aṭṭhāsi. Dakarakkhaso bodhisattaṃ udakaṃ anotarantaṃ disvā vanakammikapuriso viya hutvā bodhisattaṃ āha bho purisa tvaṃ maggakilanto kasmā imaṃ saraṃ otaritvā nhātvā pivitvā bhisamūlāni khāditvā pupphāni pilandhitvā yathāsukhaṃ na gacchasīti. Bodhisatto taṃ disvā eso yakkho bhavissatīti ñatvā tayā me bhātikā gahitāti āha. Āma mayāti. Kiṃkāraṇāti. Ahaṃ imaṃ saraṃ otiṇṇake labhāmīti. Kiṃ pana sabbeva labhasīti. Ye devadhamme jānanti te ṭhapetvā avasese labhāmīti. So atthi pana te devadhammehi atthoti āha. Āma atthīti. Yadi evaṃ ahaṃ te devadhamme kathessāmīti. Tenahi kathehi ahaṃ devadhamme suṇissāmīti . Bodhisatto ahaṃ devadhamme katheyyaṃ kiliṭṭhagatto panamhīti āha. Yakkho bodhisattaṃ nhāpetvā pānīyaṃ pāyetvā pupphāni pilandhāpetvā gandhehi vilimpāpetvā alaṅkatamaṇḍapamajjhe pallaṅkaṃ attharitvā adāsi. Bodhisatto āsane nisīditvā yakkhaṃ pādamūle nisīdāpetvā tenahi ohitasoto sakkaccaṃ devadhamme suṇāhīti vatvā imaṃ gāthamāha