Sukkadhammasamāhitāti idameva hirottappaṃ ādiṃ katvā kātabbā kusalā dhammā sukkadhammā nāma te sabbasaṅgāhikanayena catubhūmika- lokiyalokuttarā dhammā tehi samāhitā samannāgatāti attho. Santo sappurisā loketi kāyakammādīnaṃ santatāya santo. Kataññūkataveditāya sobhanā purisāti sappurisā. Loketi pana saṅkhāraloko sattaloko okāsaloko khandhaloko āyatanaloko dhātulokoti anekavidho. Tattha eko loko sabbe sattā āhāraṭṭhitikā .pe. Aṭṭhārasalokā aṭṭhārasadhātuyoti ettha saṅkhāraloko vutto. Khandhalokādayo tadantogadhāyeva. Ayaṃ loko paraloko devaloko manussalokoti ādīsu pana sattaloko vutto.
Yāvatā candimasuriyā disābhanti virocanā
tāvatā sahassadhā loko ettha te vattatī vasoti ettha okāsaloko vutto. Tesu idha sattaloko adhippeto. Sattalokasmiṃ hiyeva evarūpā sappurisā te devadhammāti vuccareti. Tattha devāti sammatidevā upapattidevā visuddhidevāti tividhā. Tesu mahāsammatakālato paṭṭhāya lokena devāti sammatattā rājarājakumārādayo sammatidevā nāma. Devaloke upapannā upapattidevā nāma. Khīṇāsavā visuddhidevā nāma. Vuttaṃpi cetaṃ sammatidevā nāma rājāno deviyo rājakumārā ca upapattidevā nāma bhummadeve upādāya taduttariṃ devā visuddhidevā nāma buddhapaccekabuddha- khīṇāsavāti. Imesaṃ devānaṃ dhammā devadhammāti. Vuccareti vuccanti. Hirottappamūlakā hi kusalā dhammā kusalasampadāya devaloke nibbattiyā ca visuddhibhāvassa ca kāraṇaṭṭhena tividhānaṃ cetesaṃ devānaṃ dhammāti devadhammā tehi devadhammehi samannāgatā puggalāpi devadhammā. Tasmā puggalādhiṭṭhānāya desanāya te dhamme dassento santo sappurisā loke devadhammāti vuccareti āha.
Yakkho idaṃ dhammadesanaṃ sutvā pasanno bodhisattaṃ āha paṇḍita ahaṃ tumhākaṃ pasanno ekaṃ bhātaraṃ demi kataraṃ ānemīti. Kaniṭṭhaṃ ānehīti. Paṇḍita tvaṃ kevalaṃ devadhamme jānāsiyeva na pana tesu vattesīti. Kiṃkāraṇāti. Yaṃkāraṇā jeṭṭhakaṃ ṭhapetvā kaniṭṭhaṃ āharāpento jeṭṭhāpacāyikakammaṃ na karosīti. Devadhammevāhaṃ yakkha jānāmi tesu pavattāmi mayaṃ hi idaṃ araññaṃ etaṃ nissāya paviṭṭhā etassa hi atthāya amhākaṃ pitaraṃ etassa mātā rajjaṃ yāci amhākaṃ pana pitā taṃ varaṃ adatvā amhākaṃ anurakkhaṇatthāya araññe vāsaṃ anujāni so kumāro anuvattitvā amhehi saddhiṃ āgato taṃ araññe yakkho khādīti vuttepi na koci saddahissati tenāhaṃ garahabhayabhīto tameva ānāpemīti. Sādhu sādhu paṇḍita tvaṃ devadhamme jānāsi tesu ca vattesīti pasannacitto yakkho bodhisattassa sādhukāraṃ datvā dvepi bhātaro ānetvā adāsi. Atha naṃ bodhisatto āha samma tvaṃ pubbe attanā katena pāpakammena paresaṃ maṃsalohitabhakkho yakkho hutvā nibbatto idāni punapi pāpameva karosi pāpakammaṃ hi nirayādīhi muccituṃ na dassati tasmā ito paṭṭhāya pāpaṃ pahāya kusalaṃ karohīti. Asakkhi ca pana naṃ dametuṃ. So taṃ yakkhaṃ dametvā tena saṃvidahitārakkho tattheva vasanto ekadivasaṃ nakkhattaṃ oloketvā pitu kālakatabhāvaṃ ñatvā yakkhaṃ ādāya bārāṇasiṃ gantvā rajjaṃ gahetvā candakumārassa uparajjaṃ suriyakumārassa senāpatiṭṭhānaṃ datvā yakkhassa ramaṇīye ṭhāne āvāsaṃ kāretvā yathā so aggapūjaṃ aggapupphaṃ aggagandhaṃ aggaphalaṃ aggabhattañca labhati tathā akāsi. So dhammena rajjaṃ kāretvā yathākammaṃ gato.