Mahāmaṅgalajātakaṃ

kiṃsu naroti idaṃ satthā jetavane viharanto mahāmaṅgalasuttaṃ ārabbha kathesi.

Rājagahanagarasmiṃ hi kenacideva karaṇīyena saṇṭhāgāre sannipatitassa mahājanassa majjhe eko puriso ajja me maṅgalakiriyā atthīti uṭṭhāya agamāsi. Aparo tassa sutvā ayaṃ maṅgalanti vatvāva gato kiṃ etaṃ maṅgalannāmāti āha. Tamañño abhimaṅgalarūpadassanaṃ maṅgalannāma ekacco hi kālasseva uṭṭhāya sabbasetaṃ usabhaṃ vā sayantaṃ gabbhinitthiṃ vā rohitamacchaṃ vā puṇṇaghaṭaṃ vā navaṇītaṃ vā gosappiṃ vā āhatavatthaṃ vā pāyāsaṃ vā passati ito uttariṃ maṅgalaṃ nāma natthīti āha. Tena kathitaṃpi ekacce sukathitanti abhinandiṃsu. Aparo na etaṃ maṅgalaṃ sutamaṅgalaṃ nāma maṅgalaṃ ekacco puṇṇāti vadantānaṃ suṇāti tathā vaḍḍhamānāti sukhanti bhuñjāti khādāti vadantānaṃ suṇāti tato uttariṃ maṅgalaṃ nāma natthīti āha. Tenapi kathitaṃ ekacce sukathitanti abhinandiṃsu. Aparo na etaṃ maṅgala Mutamaṅgalaṃ nāma maṅgalaṃ ekacco hi kālasseva uṭṭhāya paṭhaviṃ āmasati haritatiṇaṃ allagomayaṃ parisuddhasāṭakaṃ rohitamacchaṃ suvaṇṇarajataṃ bhojanaṃ āmasati ito uttariṃ maṅgalaṃ nāma natthīti āha. Tenapi kathitaṃ ekacce sukathitanti abhinandiṃsu. Evaṃ diṭṭhamaṅgalikā sutamaṅgalikā mutamaṅgalikāti tayo visadisā hutvā aññamaññaṃ saññāpetuṃ nāsakkhiṃsu. Bhummadevatā ādiṃ katvā yāva brahmalokā idaṃ maṅgalanti tathato na jāniṃsu. Sakko cintesi imaṃ maṅgalapañhaṃ sadevake loke aññatra bhagavatā añño kathetuṃ samattho nāma natthi bhagavantaṃ upasaṅkamitvā imaṃ pañhaṃ pucchissāmīti so rattibhāge satthāraṃ upasaṅkamitvā vanditvā añjaliṃ paggayha bahū devā manussā cāti pañhaṃ pucchi. Athassa satthā dvādasahi gāthāhi aṭṭhatiṃsa mahāmaṅgalāni kathesi. Maṅgalasutte vinivattante koṭisatasahassamattā devatā arahattaṃ pāpuṇiṃsu sotāpannādīnaṃ gaṇanapatho natthi. Sakko maṅgalaṃ sutvā sakaṭṭhānameva gato. Satthārā maṅgale kathite sadevako loko sukathitanti abhinandi. Tadā dhammasabhāyaṃ tathāgatassa guṇakathaṃ samuṭṭhāpesuṃ āvuso satthā aññesaṃ avisayaṃ maṅgalapañhaṃ sadevakassa lokassa cittaṃ gahetvā kukkuccaṃ bhinditvā gaganatale candaṃ uṭṭhāpento viya kathesi evaṃ mahāpañño āvuso tathāgatoti. Satthā āgantvā kāya nuttha bhikkhave etarahi kathāya sannisinnāti pucchitvā imāya nāmāti vutte anacchariyaṃ bhikkhave idāni sambodhipattassa mama Maṅgalapañhakathanaṃ svāhaṃ bodhisattakāle cariyaṃ carantopi devamanussānaṃ kaṅkhaṃ chinditvā maṅgalapañhaṃ kathesinti vatvā atītaṃ āhari